Agjencia e Shteteve të Bashkuara për Zhvillim Ndërkombëtar (USAID), me seli në Tiranë po mbështet financiarisht disa fragmente të ashtuquajtura shoqëri civile për të ushtruar presion ndaj institucioneve të drejtësisë. Por në krye të këtij organizmi që përdor fondet e Departamentit Amerikan të Shtetit, janë vendosur persona të lidhur ngushtësisht me qeverinë shqiptare.
Para pak muajsh, USAID kontraktoi The East West Management Institute (EWMI) për të krijuar projektin “Drejtësi për të Gjithë”. E vendosur me seli pranë bllokut të ambasadave, në krye të këtij institucioni u emëruan persona që mbrojnë publikisht interesat e qeverisë.
Gjithashtu, rreth 10 milion dollarë u vunë në dispozicion të projektit “Drejtësi për të Gjithë” i cili do t’i shpërndante me organizatat joqeveritare. Janë pikërisht këto organizata të vetëshpallura si shoqëri civile dhe që paguhen nga USAID, kanë dalë sot në një konferencë për media duke shantazhuar organin më të lartë të sistemit të drejtësisë, Gjykatën Kushtetuese.
“Tashmë që Komisioni i Venecias u shpreh zyrtarisht mbi pyetjet e adresuara, Gjykata Kushtetuese duhet ta shqyrtojë me përparësi çështjen e Ligjit të Vetingut! Përveç realizimit të interesit qytetar, zbatimi i kësaj reforme është parakusht për të ardhmen tonë në Bashkimin Evropian.” – shprehet koalicioni “Drejtësi për të Gjithë”.
Ky grupim i vogël që pretendon se përfaqëson shoqërinë civile është nxitur nga njerëz pranë qeverisë dhe që janë njëherësh drejtues kryesor të USAID dhe të projektit “Drejtësi për të Gjithë”. Në deklaratën e tyre, ata shkojnë deri aty sa të marrin përsipër për të monitoruar Gjykatën Kushtetuese në çdo veprim të saj.
“Duke besuar që Gjykata Kushtetuese do të vlerësojë me përgjegjshmëri të lartë opinionin e Komisionit të Venecias, si autoriteti më i urtë dhe i gjithëpranuar, ne do të ndjekim me vëmendje çdo hap të shqyrtimit të kësaj çështjeje, si dhe të zbatimit të reformës në tërësi, për të siguruar mbrojtjen e interesave të qytetarëve! “ – përfundon deklarata e koalicionit “Drejtësi për të Gjithë”.
Ky mund të jetë rasti i parë që një projekt i USAID del me një deklaratë publike duke ushtruar presion ndaj institucioneve të sistemit të drejtësisë. Në administratën e kaluar të USAID, një projekt i ngjashëm me “Drejtësi për të Gjithë” por i quajtuar “JuST” kishte të njëjtin qëllim, pra reformimin e sistemit të drejtësisë. Por në 5 vite si projekt, administrata e “JuST” nuk nxiti kurrë persona apo shoqata për të shantazhuar gjyqëtarë apo prokurorë, pavarësisht se sistemi i drejtësisë ishte edhe më i kalbur.
Sot situata ka ndryshuar…Me administratën e re të USAID, dyshime ngrihen për rolin e këtij organizmi që përdor paratë e taksapaguesve amerikanë për mbështetjen e të ashtuquajturës shoqëri civile në Shqipëri dhe që e përdor kudo e sa herë që do. Por cilat janë interesat e USAID në Tiranë, kjo mbetet për tu parë…
Donald Trump mund të mbyll USAID në vendet e botës, përfshirë edhe Shqipërinë
