Pasi Presidenti Bujar Nishani dekretoi diten e zgjedhjeve më 18 qershor, Këshilli i Lartë i Drejtësisë përzgjodhi sot 8 (tetë) gjyqtarët që do të përbëjnë Kolegjin Zgjedhor të Gjykatës së Apelit Tiranë. Fati ka dashur që mes 8 gjyqtarëve të përzgjedhur me short, të jetë edhe gjyqtari dhe anëtari i KLD, Gjin Gjoni.
8 gjyqtarët janë:
Artur Malaj
Tomor Shkreli
Ridvan Hado
Shkëlqim Mustafa
Gjin Gjoni
Astrit Kalaja
Sotiraq Lubonja
Lindita Sinanaj
Këta 8 gjyqtarë do kenë në dorë fatin e “zgjedhjeve”, të ankimimeve të subjekteve të ndryshme politike, për zona apo kandidatë të ndryshëm. Hedhja e shortit ishte e hapur për publikun dhe u transmetua live, ndërsa të pranishëm ishin edhe përfaqësues të 5 forcave politike.
Në shortin që u hodh nga Këshilli i Lartë i Drejtësisë morën pjesë 92 gjyqtarë, por vetëm 8 prej tyre u përzgjodhën si pjesë e Kolegjit Zgjedhor të Gjykatës së Apelit, Tiranë.
Ata delegohen në detyrë nga Këshilli i Lartë i Drejtësisë menjëherë pas hedhjes së shortit. Brenda 24 orëve nga përzgjedhja e tyre me short, të tetë gjyqtarët e Kolegjit Zgjedhor të Gjykatës së Apelit, Tiranë bëjnë betimin në një ceremoni publike, në prani të Këshillit të Lartë të Drejtësisë dhe nën drejtimin e Presidentit të Republikës.
