Mihajlovic: Milan-it i duhet një ekzorcist

“Lazio nuk po kalon një moment të mirë, por nuk do të vijë në San Siro për të humbur. Megjithatë besoj se gjithçka do të varet nga ne”. Këto kanë qenë fjalët e trajnerit të Milan, Sinisa Mihajlovic, gjatë konferencës për shtyp në prag të ndeshjes së mbrëmjes së nesërme që do të zhvillohet mes kuqezinjve dhe bardhekaltërve. Një ndeshje që mund të jetë vendimtare për fatin e teknikut në drejtim të milanezëve. “Me këto gjëra merreni ju gazetarët. Unë mendoj vetëm për Milan, më pas do të shohim në fund të kampionatit. Zërat për shkarkimin nuk më shqetësojnë aspak”. Në lidhje me pozicionimin e ekipit në kampionat: “Vendi i shtatë nuk kënaq asnjeri. Në ndeshjet e fundit problemi ka qenë sulmi”, ka thënë Mihajlovic, i cili ka mbështetur fjalët e thëna nga portieri Abbiati pas barazimit 0-0 në fushën e Chievo-s: “Ka bërë shumë mirë. Të gjithë duhet ta kuptojnë se duhet dhënë maksimumi dhe ndonjëherë është mirë t’i thuash gjërat para kamerave”. Në lidhje me Balotelli dhe Menez: “Kanë 10 ndeshje në dispozicion për të më bindur. Kam katër sulmues dhe nuk më intereson kush luan, kur zbresin në fushë duhet të bëjnë diferencën. Çfarë na mungon? Një psikiatër ose një ekzorcist”, ka përfunduar trajneri kuqezi.