Dy persona janë shpallur në kërkim lidhur me ngjarjen e djeshme në Tiranë, kur nga një makinë tip “Alfa Romeo”, kanë kërcënuar qytetarë me armë zjarri dhe më pas ka dhënë spektakël në kryeqytet ndërsa policia i ndiqte.
Dy të rinjtë madje e hipën makinën mbi trafikndarëse për t’i ikur policisë por pasi makina e tyre “Alfa Romeo” ngeci, ata e braktisën dhe u larguan.
Një prej tyre është Kataldo Lezhja (foto), 25 vjeç, i cili njihet si mik i të fortit të “Myslym Shyrit”, Gjergj Cukali. Ky i fundit u arrestua në korrik të këtij viti gjatë operacionit antidrogë të koduar “Tangent”.
25-vjeçari Lezhja, i shpallur në kërkim është një emër i njohur për policinë sepse ka qenë disa herë i dënuar për vjedhje dhe plagosje. Vetëm për konfliktet për zënien e parkimit, Lezhja është arrestuar 3 herë nga policia.
Në 2015, Lezhja u arrestua, pasi plagosi dy të rinj në rrugën “Mujo Ulqinaku” vetëm se i kishin zënë parkingun. Në dhjetor të vitit 2013, ai u shpall në kërkim dhe u arrestua pak javë më vonë, pasi kishte goditur me thikë një 25- vjeçar, pas një debati që kishte pasur me të për parkimin e makinës.
Në vitin 2012 Cukali dhe Lezhja u arrestuan për një ngjarje të kryer në bashkëpunim, pranë Shkollës së Baletit. Sërish për një vend parkimi, ata kërcënuan me armë dhe goditën një punonjës të një firme private. Për ngjarjen e mbrëmshme policia ka shpallur në kërkim edhe pronarin e makinës.
