Nga Boldnews.al
Ligji për Vettingu-n është futur në një qarkore të errët ku dyshimet për tjetërsimin e dokumentit nëpërmjet përkthimit implikon zyrtarët e EURALIUS. Por nga ana tjetër, kjo nuk nxjerr të paprekur opozitën e cila po bën përpjekje për të shtyrë votimin e Vettingu-t në parlament.
Misioni europian që asiston vendin tonë në Konsolidimin e Sistemit të Drejtësisë, EURALIUS është autori i përkthimit në anglisht të ligjit të Vettingu-t që i është dërguar Komisionit të Venecias nga Gjykata Kushtetuese. Burime për Boldneës.al bëjnë me dije se përkthimi ka gabime të rënda që ndryshojnë kuptimin e neneve të ligjit të Vettingu-t dhe paragrafet thelbësore të tij nuk përputhen me variantin shqiptar të miratuar në Parlament.
Për këtë arsye Gjykata Kushtetuese, e vënë në dijeni nga opozita që pretendon se varianti në anglisht rrëzon të gjithë thelbin e ligjit, u detyrua ta përkthente me ekspertë të tjerë Vettingun dhe t’ia dërgonte sërish Venecias një ditë më parë.
Ky gabim, rastësor apo i qëllimshëm duket se i ka kushtuar pozicionin e punës shefit të EURALIUS në Tiranë, Rainer Deville, i cili është larguar me urgjencë nga Shqipëria rreth një javë më parë. Zoti Deville e mbaronte zyrtarisht mandatin e tij si Shef i misionit EURALIUS në Gusht të vitit 2017.
Kjo është hera e dytë kur ekspertë të misionit EURALIUS kapen “mat” me gabime në trajtimin e dokumentacionit të reformës në drejtësi. Në verë, një natë përpara votimit të reformës në drejtësi, njeri nga ekspertët e EURALIUS u shpreh se po paraqiste në tryezën e debatit opinionet dhe sugjerimet e Brukselit ndërkohë që një ditë më pas u mësua se ai nuk kishte komunikuar fare me ta.
Misioni EURALIUS është një entitet i Bashkimit Evropian i cili ndihmon Shqipërinë në jurisprudencë, për reformat ligjore dhe kushtetuese. Por ky entitet në vend që ta përmirësojë, e ka nxirë imazhin e Shqipërisë, duke e turpëruar si para Komisionit të Venecias ashtu edhe në sytë e Bashkimit Europian.
Por ky gabim i misionit të EURALIUS duket se po shfrytëzohet politikisht edhe nga Partia Demokratike. Në një tentativë për të ndikuar në rekomandimin e KE-së për Shqipëri më 12 dhjetor, Partia Demokratike po shfrytëzon këtë gabim të EURALIUS. Madje në këtë “lojë” mund të jetë përfshirë edhe Gjykata Kushtetuese e cila ka marrë përsipër përkthimin për herë të dytë të draftit të Vettingu-t.
Boldnews.al mëson se më 25 tetor është bërë mbledhja e Komisionit të Venecias dhe opinionin e tyre ia ka dërguar të dy palëve politike, PD dhe PS. Burimet shtojnë më tej, se Komisioni i Venecias duhet ta mbyllë draftin final në datë 7 dhjetor dhe do t’i dërgohet Gjykatës Kushtetuese. Ndërkohë ky opinion do të merret parasysh nga Këshilli i Europës për hapjen e negociatave për Shqipërinë. Ndërsa palëve në Shqipëri do tu dërgohet më datën 9 dhjetor.
Ndërkohë më 12 dhjetor pritet të jepet edhe rekomandimi i KE-së për Shqipërinë për hapjen e negociatave. Boldnews.al bën të ditur nga burime diplomatike se pritet të hapet drita jeshile për negociatat me Shqipërinë, por vendet anëtare do të vendosin si kusht datën. “Në momentin që do të shohim progres për reformën në drejtësi dhe reformat e tjera, do të ulemi për të caktuar datën.” – do të jetë përkufizimi i rekomandimit të KE-së në vija të trasha.
