Themeluesi i partisë LIBRA, Ben Blushi, kritikoi buxhetin e ri të vitit 2017, që sipas tij u merr paratë të varfërve dhe ua jep të pasurve, diçka e papranueshme për kushtet e Shqipërisë. Ai ka theksuar se rilindja e taksës progresive sot takson më shumë njeriun e shkolluar sesa ate që ka pronë të trashëguar.
Në fjalimin e mbajtur në Kuvend, ish¬-deputeti socialist theksoi se buxheti është thjesht elektoral dhe nuk ofron asgjë për arsimin, bujqësinë dhe hapjen e vendeve të punës.
“Çfarë bën ky buxhet, kujt ja merr paratë? Kjo qeveri dhe ato që ishin para kësaj mendojnë se buxheti është një arkë, dhe qeveria për shkak të votave që merr ka të drejtë të fusë dorën në arkë për t’i shpërndarë paratë. Përmes buxhetit, një qeveri moderne bën politika me buxhetin. Ju pyes sot këtu, ju që folët, çfarë mbështesni? Arsimin? Është kuota më e ulët që nga viti 2005. Bujqësinë? Asnjë subvencion nuk ka. Mbështesni Shëndetësinë? Absolutisht jo. Mbështesni hapjen e vendeve të punës? Absolutisht jo. Ka vetëm një politikë elektorale. Ky buxhet jo vetëm që u merr më shumë para të varfërve, por prapë ua çon të pasurve. Kjo është e papranueshme për një vend të polarizuar si Shqipëria”, tha Blushi.
Sipas tij jo vetëm për vjeljen e të ardhurave, por edhe për rishpërndarjen e tyre, Rilindja është e padrejtë.
