Analistët Andi Bushati dhe Baton Haxhiu gjatë emisionit “Shock” në Euronews Albania kanë diskutuar mbi ngjarjen e rëndë të ndodhur sot në Elbasan, ku një person mbeti i vrarë.
Për z. Haxhiu ngjarja është një vrasje me ftohtësi dhe ekzekutimin nuk e arsyeton asnjë përleshje dhe theksoi se “kushdo që ka synuar që të destabilizojë zgjedhjet ka bërë një krim tjetër”.
“Është një dhimbje e madhe që këtë herë nuk kam besuar që do të ndodhi”, shtoi z. Haxhiu.
Nga ana tjetër z. Bushati u shpreh se ngjarja “është vetëm fillimi i diçkaje që do të bëhet më e madhe”.
“Sepse kur pushteti vendos t’i grabisë zgjedhjet me dhunë incidente të tilla janë të pashmangshme”, tha ai.
Për analistin Bushati “përgjegjësi politik i vrasjes është vetëm një, Edi Rama” duke e lidhur atë me përplasjen e simpatizantëve Ditën e Verës.
“Në ngjarjen e ditës së verës viktima e sotme ka qenë një nga njerëzit që ka ushtuar dhunë në emër të Edi Ramës dhe Taulant Ballës mbi ithtarët e PD. Nëse do të kishim një polici profesionale dhe një shtet ligjor profesional, ai sot nuk do të ishte në varr por në burg. Është në varr dhe jo në burg sepse Edi Rama e donte kamikaz që të vazhdonte të punonte për të vjedhur zgjedhjet. Nëse i yshtim këta njerëz me të shkuar kriminale të vjedhin zgjedhjet në emër të pushtetit kjo që kemi parë sot do të jetë vetëm fillimi i një gjakderdhje dhe katastrofe më të madhe”, tha Andi Bushati.
Por sipas Baton Haxhiut “asnjë moment i tillë nuk mund të vijë në pikën e vrasje nëse nuk ka cytje politike dhe fakti se cytja politike zakonisht ndodh prej humbësve është problem”, ndërsa shtoi se autori i vrasjes në Elbasan është “mish për top”.
Sipas z. Haxhiu në Shqipëri të gjitha partitë politike kanë krijuar sistem paralel për të mbrojtur votën.
“Nuk ka parti politike që nuk ka krijuar sistem paralel të shteti dhe Elbasani është vendi ekzemplar kur banditët kanë pas përplasje të vazhdueshme pasi gjithmonë kanë qenë të rekrutuar”, tha ai.
Andi Bushati përfundoi argumentin e tij duke thënë se “po përgatitet një masakër elektorale”.
