Zëdhënësi për shtyp i Presidentit Meta, Tedi Blushi ka bërë me dije se ky i fundit pritet të niset drejt Kavajës pas ngjarjes ë rëndë që ndodhi sot në një nga zyrat elektorale të Partisë Demokratike.
Presidenti ndodhet në Elbasan ku ka organizuar dhe një darkë me 5 krerë të komuniteteve fetare. Sipas Blushit ai do të niset urgjentisht menjëherë drejt Kavajës ndërsa ka apeluar qytetarët të ruajnë qetësinë e të mos bien pre e provokimeve.
Në Kavajë ka mbërritur dhe kreu i PD-së Lulzim Basha i cili është pritur dhe nga qindra qytetarë.
Njoftimi i Presidencës:
Presidenti i Republikës, Sh.T.Z Ilir Meta po e ndjek me shumë shqetësim situatën në Kavajë.
Për shkak se aktualisht, Kreu i Shtetit ndodhet në Elbasan, në një iftar të organizuar nën kujdesin e Tij, me klerikët lokalë të pesë komuniteteve fetare, ku janë të ftuar edhe personalitete të nderuara të qytetarisë elbasanase, si dhe për shkak të një interviste të planifikuar më herët në TV “Skampa”, bëj me dije se menjëherë pas saj, Presidenti Meta do të niset urgjentisht drejt Kavajës.
Kreu i Shtetit i fton qytetarët e Kavajës të mos provokohen dhe të ruajnë qetësinë në këto ditë të fundit para Referendumit të Ndryshimit të Madh të 25 Prillit.
