Drejtuesit socialistë i janë drejtuar me një memo organizatave të kësaj partie, në prag të zgjedhjeve parlamentare të 25 prillit.
Krahas anës organizative, ajo që tërheq vëmendjen, është pika 5, ku flitet për raportet me kundërshtarin.
Dhe në këtë pikë, në memon e publikuar nga komediani i njohur Julian Deda, thuhet “shkrirja e LSI-shfrytëzimi i çdo mundësie”. Kështu pasi Kryeministri Edi Rama thithi disa nga figurat e kësaj partie, që i kandidoi në listat e PS-së, si në rastin e Lefter Kokës në Durrës apo Nasip Naços në Berat, duket se objektivi i rradhës i Rilindjes është shkrirja e LSI-së.
Kjo në fakt nuk përbën ndonjë risi, pasi mjafton të rikthehen në vëmendje deklaratat e Kryeministrit Rama dhe drejtuesve të tjerë të PS-së, për të kuptuar objektivin qëkanë në raport me LSI-në, e cila nga 2013 deri në 2017 bashkëqeverisi me Ramën.
Gjithashtu në memo u kërkohet strukturave socialiste që të përthithin elementë të kundërshtarëve. Po në pikën 5 të memos, kërkohen raporte mbi punonjësit e administratës publike që marrin pjesë në tubime apo fushatë.
