Ambasadorja e Shteteve të Bashkuara të Amerikës, Yuri Kim ka vizituar sot qytetin e Shkodrës.
Gjatë kësaj vizite, Kim ka zhvilluar takime me përfaqësuesit e të gjitha forcave politike.
Fillimisht, ambasadorja e SHBA është ndalur te selia e PD në kryeqendrën e veriut, ku është pritur nga drejtuesi politik i PD për Qarkun e Shkodrës, Helidon Bushati.
Mësohet se në fokus të takimit ka qenë situata politike në vend teksa po zhvillohet fushata elektorale për zgjedhjet parlamentare të 25 prillit. Kim ka përsëritur mesazhin se forcat politike duhet të zhvillojnë fushatë të moderuar dhe të qetë, larg toneve konfliktuale si dhe të mos cenohet vota e qytetarëve.
Pas takimit me Helidon Bushatin, Yuri Kim i është drejtuar selisë së PS, ku është pritur nga përfaqësuesja politike e kësaj force politike, Edona Bilali. Mesazhet e diplomates amerikane kanë qenë të njëjta.
***
Ndryshe nga qyteti i Elbasanit ku takimi zhvillua në ambientet e një hoteli, në Shkodër ambasadorja ka shkuar në çdo seli politike ku ka takuar përfaqësuesit përkatës të partive.
Dy javë më parë në Elbasan, ambasadorja përcolli mesazhin e SHBA-së drejtuesve politikë, Taulant Balla, Gazmend Bardhi, Monika Kryemadhi e Rudina Hajdari.
“Fuqia përfundimtare qëndron te votuesit. Atyre që u kërkohet t’u blihet vota do t’u thoja: Vota juaj është pushteti juaj, prandaj mos e dorëzoni këtë!”, nënvizoi ambasadorja në një prononcim për mediat pas takimit në Elbasan më 10 mars.
