Nga Boldnews.al
Një nga institucionet që po shpenzon më shumë në këtë kohë, është padyshim Komisioni Qendror i Zgjedhjeve. Kryetari dhe anëtarët e rinj kanë “bekimin” e Rilindjes, teksa Celibashi & Co kanë shpenzuar pafund në këtë prag fushate dhe zgjedhje. BoldNews ka siguruar dokumentet e një tjetër tenderi të firmosur nga kryetari Ilirjan Celibashi, i cili ka shpenzuar plot 1 milionë USD për tenderin e votimit dhe numërimit elektronik të votave. Përpos shifrës, ajo që bie në sy në tender është se nuk ka pasur garë, por vetëm zgjedhje të kësaj kompanie si “oferta më e leverdisshme”. Duket se është një marrëveshje mes KQZ-së dhe kompanisë holandeze, e cila ka përfituar rreth 1 milionë USD.
Në dokumente thuhet se kompania fituese është “Smartmatic International Holding B.V”, e cila ka fituar tenderin e KQZ-së me objekt sisteme/pajisje të teknologjisë së informacionit për votimin dhe numërimin e votave”. Holandezët do të përfitojnë këtë shumë për vetëm 60 ditë, ndërsa vlera është 961,180 USD, shumë e cila e konvertuar në lekë është 99,424,460 lekë pa TVSH. Nisur nga dokumentet, rezulton se në tender ka marrë pjesë vetëm kjo kompani, e cila është e regjistruar në qytetin e Amsterdamit, Holandë, me një vlerë të përgjithshme prej 961,180 USD.
Sipas dokumenteve, projekti i KQZ-së ka për qëllim ngritjen e një sistemi elektronik i menaxhimit të votimit dhe rezultateve në Shqipëri, i cili do të aplikohet në zgjedhjet e ardhshme Parlamentare 2021, në 32 qendra votimi. “Për votimin elektronik te zgjedhësve do të implementohet Sistemi Elektronik i Menaxhimit të Votimit dhe Rezultateve duke përdorur Pajisje Elektronike e Votimit dhe Numërimit të vendosura nga 2 në çdo qendër votimi pjesë e projektit” thuhet në këto dokumente. Sipas saj, në këto qendra do të ofrohet votimi elektronik si dhe përllogaritja e rezultatit përfundimtar në nivel të Qendrës së Votimit, pas mbylljes së procesit të votimit në secilën qendër respektivisht.
