Kryeministri Edi Rama ka kthyer sytë nga Moska dhe Pekini për vaksinat anti-Covid. Duket se dështimi për të siguruar vaksinat nga kompanitë tashmë të çertifikuara nga SHBA dhe BE, si dhe ofrimit të zgjedhjeve të 25 prillit, Rama është dorëzuar duke autorizuar ministrat Ogerta Manastirliu dhe Arben Ahmetaj për zhvillimin e negociatave me prodhues apo distributorë të autorizuar, qeveri ose institucione, të vendeve prodhuese të vaksinave.
Kushti i vetëm në Aktin Normativ të Qeverisë Rama është që vaksinat duhet të jenë të çertifikuara në vendin e prodhimit të tyre. Kjo nuk përjashton mundësinë që të sillen edhe vaksina indiane kundër Covid, apo të çdo vendi tjetër, mjafton që ato të kenë marrë autorizimin nga institucionet e brendshme.
Ky është një ndryshim 100 % i qëndrimeve nga Kryeministri Rama, i cili për show dhe propogandë përdori vaksinat, duke pretenduar se kishte siguruar me mijëra e mijëra doza nga kompanitë tashmë të njohura Pfizer apo Astra Zeneca.
Në fund të 2020, Rama reagoi ashpër kur Ambasada Ruse në Tiranë njoftonte se Rusia është e gatshme të sjellë vaksinën e saj “Sputnik V” në Shqipëri.
Rama e quajti këtë postim të papërshtatshëm dhe provokim, ndërsa shtoi se nuk i shkon një shteti serioz si Rusia të përfshihet në prodhimin e memeve. Sipas kreut të qeverisë shqiptare, ky është një provokim qesharak nga shteti rus, ndërsa shtoi se mirëpret një ndjesë nga ambasada ruse.
Nga ana tjetër, kryeministri theksoi se aktualisht Shqipëria është e fokusuar te vaksinat e kompanive Pfizer, AstraZeneca dhe Moderna, ashtu si dhe vendet e Bashkimit Evropian.
Pak javë më pas, Rama u lëkund në qëndrimin e tij, duke paralajmëruar se mund t´i hapej rruga edhe vaksinave të tjera, ruse apo kineze, edhe pse ato nuk janë çertifikuar nga institucionet përkatëse në BE dhe SHBA. E gjithë kjo situatë tregon se Qeveria e drejtuar nga Edi Rama nuk ka pasur asnjë strategji lidhur me sigurimin e vaksinave, përkundrazi, gjithçka e përdori si show dhe propogandë, duke arritur deri aty sa procesi i vaksinimit me pikatore që po zhvillohet, nuk niste pa shkuar Kryeministri, që shfaqej si një ekspert i Shëndetit Publik.
Akti Normativ
DHËNIEN E AUTORIZIMIT MINISTRIT TË SHËNDETËSISË DHE MBROJTJES SOCIALE DHE MINISTRIT TË SHTETIT PËR RINDËRTIMIN PËR ZHVILLIMIN E NEGOCIATAVE ME PRODHUESIT, ME DISTRIBUTORË TË AUTORIZUAR, ME QEVERITË OSE INSTITUCIONET E AUTORIZUARA PREJ TYRE, TË VENDEVE QË PRODHOJNË OSE DISTRIBUOJNË VAKSINA ANTICOVID, PËR TË SIGURUAR KËTO VAKSINA, TË CILAT JANË TË CERTIFIKUARA NGA TRUPA CERTIFIKUESE NË VENDIN E PRODHIMIT TË TYRE
Në mbështetje të nenit 101 të Kushtetutës, me propozimin e ministrit të Shëndetësisë dhe Mbrojtjes Sociale dhe të ministrit të Shtetit për Rindërtimin, Këshilli i Ministrave
V E N D O S I:
Neni 1
Dhënie autorizimi për zhvillimin e negociatave
Dhënien e autorizimit ministrit të Shëndetësisë dhe Mbrojtjes Sociale dhe ministrit të Shtetit për Rindërtimin për zhvillimin e negociatave me prodhuesit, me distributorë të autorizuar, me qeveritë ose institucionet e autorizuara prej tyre, të vendeve që prodhojnë ose distribuojnë vaksina anticovid, për të siguruar këto vaksina, të cilat janë të certifikuara nga trupa certifikuese në vendin e prodhimit të tyre.
Neni 2
Hyrja në fuqi
Ky akt normativ hyn në fuqi menjëherë dhe botohet në “Fletoren zyrtare”.
