Lëvizja Socialiste për Integrim (LSI) ka denoncuar atë që e konsideron si “afera e inceneratorit të Elbasanit”, në të cilën përfshin edhe ish-ministrin e Mjedisit, Lefter Koka.
Nënkryetari i LSI-së, Petrit Vasili, në një dalje mediatike mesditën e së Enjtes publikoi një seri dokumentash, të cilat, sipas tij, provojnë se kompania koncensionare e inceneratorit të Elbasanit “Albtek Energy” dhe ish-ministri Koka, kanë përfituar miliona euro nëpërmjet kryerjes së veprimeve fiktive.
Vasili u shpreh se pronarja e deklaruar e kompanisë “Albtek Energy”, Stela Gugallja, në fakt është një person që mbulon përfituesin e vërtetë, Klodian Zoto.
Për të konfirmuar këtë deklarim, zyrtari i LSI-së tregoi me dokumenta se Gugallja, në kohën që themeloi “Albtek Energy”, në vitin 2014, në fakt ishte ekonomiste në kompaninë “Integrated Technology Service” të Klodian Zotos.
Duke iu referuar të njëjtave dokumentave, Vasili u shpreh se Gugallja ka qenë e punësuar e Zotos deri në vitin 2015, ndërkohë që kompania e regjistruar në emrin e saj kishte fituar më herët kontratën koncensionare për inceneratorin e Elbasanit.
Në vijim, Petrit Vasili tregoi dokumenta zyrtarë, në të cilët shënohet se “Albtek Energy” ka paguar disa qindra mijëra euro për konsulta juridike në zyrën ligjore të Klodian Zotos.
Këto veprime, sipas Vasilit, dëshmojnë qartë se e gjitha është një skemë fiktive për të përfituar para, të cilat u janë dhënë për ndërtimin e inceneratorit nga Ministria e Mjedisit dhe Ministria e Infrastrukturës, e cila në atë kohë drejtohej nga Damian Gjiknuri.
Gjithashtu, Vasili tregoi edhe dokumenta të tjerë, në bazë të të cilave, sipas tij, rezulton se kompania ka shpenzuar mbi 1.4 milionë euro për paga, ndërkohë që në studimin e fizibilitetit për inceneratorin, të dorëzuar prej vetë shoqërisë private, ishte shënuar se rrogat do të ishin në vlerën e rreth 750 mijë eurove.
Drejtuesi i lartë i LSI-së publikoi emrat e 8 kompanive, të cilat sipas tij janë të gjitha thuajse fiktive dhe të lidhura drejtëpërdrejtë me Lefter Kokën.
Këto kompani, sipas dokumentave të prezantuar nga Vasili, kanë deklaruar shitje shërbimesh tek “Albtek Energy” dhe për të cilat janë paguar në total në rreth 3.4 milion euro.
Sipas denoncimit të Petrit Vasilit, më poshtë është lista e kompanive, të lidhura me Lefter Kokën, si edhe paratë që ato kanë përfituar nga “Albtek Energy”
– Kompania “Pivot 4” ka marrë 860 mijë euro nga “Albtek Energy”. Gjithë vlerën e marrë nga kjo kompani është shkarkuar në kompaninë e ministrit të vendosur në emër të vëllait të Lefter Kokës;
– Kompania “Sili” ka marrë 456 mijë euro nga “Albtek Energy”
– Kompania “Bellar Inert” ka marrë rreth 430 mijë euro nga “Albtek Energy”
– Kompania “Deto” ka faturuar për “Albtek Energy” rreth 450 mijë euro punime
– Kompania “R.B General Service” ka faturuar për “Albtek Energy” rreth 420 mijë euro
– Kompania “TGV&T-2014” ka faturuar për “Albtek Energy” në vlerë rreth 320 mijë euro
– Kompania “JPY”
– Kompania “Sh-Sh” ka faturuar rreth 120 mijë euro për shërbime të ofruara për “Albtek Energy”
Pas prezantimit të dokumentave, nënkryetari i Lëvizjes Socialiste për Integrim, Petrit Vasili, deklaroi se të gjithë materialet do të jenë pjesë e një kallëzimi që do t’i dorëzohet Strukturës së Posaçme Anti-Korrupsion (SPAK) për të hetuar penalisht të gjithë personat e përfshirë.
