Barcelona eliminohet nga Champions League teksa PSG kalon në çerekfinale. Përballja e dytë mes dy ekipeve në “Parc des Princes” është mbyllur në barazim 1-1, me francezët që kalojnë me tej me rezultatin e përgjithshëm 5-2.
Fillimisht, ishte PSG që mori avantazhin në fakt, me anë të Mbappe, që shënoi nga pika e bardhë e penalltisë. Reagimi i Barcelonës erdhi menjëherë pas 7 minutash, ku Lionel Messi shënoi një gol spektakolar nga distanca.
Në fundin e pjesës së parë erdhi dhe rasti i artë, që mund t’i jepte një rrjedhë tjetër takimit. Griezmann fitoi një 11-metërsh dhe Messi u paraqit për ta ekzekutuar.
Ndodh shumë rrallë që Messi të humbasë penallti dhe diçka e tillë ndodhi pikërisht sot. “Pleshti” u ndal nga Keylor Navas dhe traversa dhe pjesa e parë u mbyll në barazim 1-1. Në 45 minutat e dyta Barcelona duhet të shënonte 3 herë dhe të mos pësonte për ta çuar të paktën në shtesë ndeshjen por kjo gjë nuk ndodhi teksa PSG-ja kontrolloi me qetësi lojën dhe në fund prenë biletën për në raundin tjetër.
