Nga Boldnews.al
Kryetari i Partisë Socialiste, Edi Rama, po e përdor “Reformën në Drejtësi” si një prej kuajve të tij kryesorë të betejës elektorale të 25 Prillit, megjithëse ndryshimet kushtetuese të vitit 2016 u miratuan me konsensus absolut të të gjithë partive parlamentare.
Megjithatë, në leksikun e tij, Rama u kërkon votën qytetarëve, duke premtuar se ai dhe vetëm ai e do drejtësinë dhe reformimin e saj.
Por, përtej deklaratave propagandistike, Rama ka zhbërë të gjithë socialistët, të cilët u përfshinë jo vetëm në reformën kushtetuese, por edhe në emërimin e zyrtarëve të “drejtësisë së re”, të cilët i siguruan kryeministrit një kontroll thuajse absolut mbi gjyqësorin dhe prokurorinë.
Në listat e kandidatëve për deputet, të dorëzuar mesnatën e kësaj të Hëne, Edi Rama ka përjashtuar nga postet fituese, ose ka nxjerrë tërësisht nga gara elektorale deputetët, të cilët i angazhoi në hartimin e Reformës në Drejtësi.
I pari, Fatmir Xhafaj, ai që përkëdhël sedrën e tij duke u vetëquajtur “babai i Reformës” dhe njëkohësisht vëllai i trafikantit Agron (Geron) Xhafaj, e sheh veten i 23-ti në listën e kandidatëve të Partisë Socialiste në Tiranë.
Duke marrë në konsideratë se PS, në ditët e saj më të mira, nuk ka arritur të marrë këtë numër deputetësh në kryeqytet, duket qartë se Fatmir Xhafaj është vendosur vetëm si “numëror topi” në listën e hartuar nga Edi Rama.
Vasilika Hysi, një prej deputeteve më të angazhuara për t’i dorëzuar drejtësinë kryetarit të saj, u detyrua të qëndrojë jashtë liste. Në një fjalim “prekës” para drejtuesit të partisë, ish-profesoresha deklaroi se u dorëhoq nga angazhimi parlamentar, për t’u hapur rrugë më të rinjve.
Pas largimit të Hysit, rruga iu hap ekspertes së tërmeteve, Luljeta Bozo, e cila, me statusin e stërgjyshes, natyrisht nuk mund të quhet “e re”.
Spartak Braho, i cili iu ribashkua Partisë Socialiste pas militoi për disa vjet në Lëvizjen Socialiste për Integrim dhe gjithashtu një prej anëtarëve të Komisionit të Reformës në Drejtësi, gjendet në vendin e 28 në listën e kandidatëve të maxhorancës aktuale në Tiranë.
Me këtë pozicion, duket se Rama ka vendosur ta nxjerrë përfundimisht në pension “Baba Takun”.
Pandeli Majko, ish-kryeministër, aktualisht Ministër për Diasporën dhe një prej anëtarëve të Komisionit të Reformës në Drejtësi, duhet të kryqëzojë gishtat dhe të shpresojë që Partia Socialiste të marrë deri në 19 mandate në Tiranë, pozicion ku gjendet sipas dokumentit të dorëzuar nga Rama në Komisionin Qendror të Zgjedhjeve.
Nëse Majko nuk arrin të fitojë mandatin e deputetit, ai, me shumë mundësi, do të fillojë të shkruajë libra kujtimesh, pasi do të ketë shumë kohë të lirë.
Në listën e mungesave është edhe Adnor Shameti, i cili iu bashkua grupit të “Reformës në Drejtësi” me ndërhyrjen e Fatmir Xhafajt. Shameti deklaroi pak ditë më parë se nuk do të ishte pjesë e listave për deputet, pasi nuk pranonte që të ishte i renditur poshtë ish-lsi-stave, Nasip Naço e Gledion Rehovica në Berat.
Klotilda Bushka, gjithashtu pjesëmarrëse në grupin e Reformës në Drejtësi dhe një prej prurjeve të hershme të Erion Veliajt në Partinë Socialiste, gjendet numri 16 në listën e Tiranës.
Nuk është një pozicion shumë i lakmuar, por gjithësesi përfshihet brenda numrit të deputetëve të fituar nga Partia Socialiste në zgjedhjet e vitit 2017.
Një pozicion më të privilegjuar duket se kanë ish-reformistët, Ulsi Manja dhe Ermonela Felaj. Ata janë të renditur përkatësisht në vendin e gjashtë dhe të trembëdhjetë në listën e kandidatëve të Socialistëve për Tiranën.
