Nga Boldnews.al
Aktori i ndjerë, Naun Shundi, mbahet mend nga publiku shqiptar për dhjetra role në Teatër e kinema. Një zë kritik ndaj padrejtësive shoqërore në të gjallë, personaliteti i artit vijon të denoncojë edhe pas ndarjes nga jeta, në gusht të vitit të kaluar.
Rasti i Naun Shundit është ndër më tipikët për të treguar dështimin e sistemit gjyqësor, sidomos pas Reformës së rrëmujshme në Drejtësi.
Prej më shumë se 10 vitesh, aktori Shundi kishte nisur një proces gjyqësor me Qendrën Kombëtare të Artit dhe Kulturës për një pagesë të munguar në shumë 1.2 milionë lekë të reja, për një projekt artistik.
Në Maj të vitit 2026, kur ka kaluar më shumë se një dekadë, çështja ende nuk është zgjidhur. Gjykata e Lartë, në një seancë të datës 13 maj të këtij viti, vendosi të shtynte seancën, për “shkak të kalimit procedurial nga pala e paditëse Naun Shundi, tek trashëgimtaret ligjore”, bashkëshortja dhe dy vajzat.
Kolegji Administrativ i Gjykatës së Lartë vendosi të shtyjë seancën në 3 qershor, ndërkohë që aktori nuk arriti të përfitojë mundin e punës së tij përsa kohë ishte në jetë.
“Të gjithë janë të çmendur”
Në qershor të vitit 2013, Qendra Kombëtare e Artit dhe Kulturës, e drejtuar në atë kohë nga analisti i sotëm Frrok Çupi, nënshkruan një kontratë me regjisorin Naun Shundi, për zhvillimin e provave dhe vënien në skenë të veprës “Të gjithë të çmendur”.
Titulli i veprës, si për ironi të fatit, e shoqëroi edhe zbatimin e kësaj kontrate. Naun Shundi, për këtë aktivizim, duhet të paguhej me 300 mijë lekë për secilën nga dy seanca prove dhe dy raste të vënies në skenë të teatrit, për një total prej 1.200.000 lekë të reja.
Në nëntor të vitit 2015, Teatri Eksperimental “Kujtim Spahivogli” konfirmoi në një dokument zyrtar se vepra “Të gjithë të çmendur” e regjisorit Shundi ishte vendosur në skenë në dy netë, në 13 dhe 14 maj 2025.
Pra, qartësisht, regjisori Shundi e kishte përmbushur pjesën e tij të kontratës. Por, për arsye të paqarta, Qendra Kombëtare e Artit dhe Kulturës nuk kryen pagesën për shërbimin e ofruar.
Këtu nis saga gjyqësore, e cila ende nuk ka marrë fund edhe pas 13 vitesh nga nënshkrimi i kontratës.
Ende pa drejtësi, edhe pas vdekjes
Për një rastësi fatkeqe, procesi gjyqësor i nisur nga Naun Shundi për të fituar një të drejtë që, me shumë mundësi i takonte, u zhvillua në një kohë që Shqipëria miratoi Reformën në Drejtësi.
Natyrisht, në një situatë normale, çështja e një kontrate normale nuk do të duhet të kishte aspak lidhje me vendimmarrje të rëndësishme politike e gjeostrategjike të Shtetit Shqiptar.
Por, në një vend të vogël si i yni, hallet e mëdha shtetërore ndërthuren dhe mbysin problemet e individëve. E kështu, Reforma në Drejtësi solli zbrazje të gjykatave nga magjistratët, duke shtyrë në pafundësi proceset gjyqësore të qytetarëve të thjeshtë, përfshirë edhe ato të aktorëve të njohur.
Naun Shundi nisi kalvarin e përballjes në gjykata me institucionet në varësi të Ministrisë së Kulturës. Në vitin 2019, çështja u regjistrua në Gjykatën e Lartë.
Në atë kohë, gjykata më e lartë e vendit ishte boshatisur thuajse plotësisht për shkak të procesit të ndërlikuar, shumëdimensional dhe të dyshimtë të Vetingut.
Naun Shundi, si mijëra shqiptarë të tjerë, qëndroi për shumë vite në pritje të plotësimit të Gjykatës së Lartë, me shpresën e shqyrtimit dhe marrjen e drejtësisë së munguar prej shumë vitesh.
Por, mungesa 3-vjeçare e gjyqtarëve të lartë krijoi kolapsimin e institucionit dhe shtoi në mënyrë progresive çështjet gjyqësore që prisnin për shqyrtim.
Duke filluar nga viti 2021, Gjykata e Lartë nisi plotësimin me gjyqtarë dhe, nga aty nisi rrugëtimi i ri i shqyrtimit të dosjeve që prisnin me vite në sekretarinë e saj.
Naun Shundi vijoi aktivitetin e tij, mes arritjeve profesionale dhe problemeve shëndetësore. Këto të fundit, në 28 Gusht 2025 e mundën dhe regjisori i njohur ndahet nga jeta. Tashmë, procesi gjyqësor për një kontratë që ka nisur në vitin 2013, do të vijohet nga familjarët e tij, si trashëgimtarë ligjorë.
