Listat e kandidatëve të PS-së në disa qarqe të vendit do të kryesohet nga kandidatet femra.
Duket se Kryeministri Edi Rama ka zgjedhur 8 marsin për të bërë të ditur vendimin, ndërsa listat zyrtare të kandidatëve do të dorëzohen në KQZ brenda mesnatës së sotme.
Rama tha sot se listat e Shkodrës dhe Vlorës do të kryesohen nga Edona Bilali dhe Pranvera Resulaj.
“Kush do jenë të parët në lista? Me shumë kënaqësi po ua jap këtë informacion duke qenë se të parët në lista nuk kemi asnjë debat. Pjesa më e madhe e tyre janë gra dhe vajza.
Po filloj me radhë. Edona Bilali është vendi i parë në Shkodër, personazh shumë i respektuar, një vajzë e përfshirë prej vitesh në projekte me donatorët në mbështetje dhe nxitje të krijimit të ndërmarrjeve të vogla, pedagoge në lëndën e ekonomisë dhe aktualisht doktorante në Austri. Është një prurje krejt e re.
Më tutje, Pranvera Resulaj e para në Vlorë. Është kandidate e mbështetur me shumë këmbëngulje nga gjithë komuniteti i biznesit në Vlorë. Ka qenë për një periudhë kohe drejtore e Tatimeve në Vlorë që gëzon reputacion. Meriton respekt duke qenë se përputhen më së miri për ne”, tha Rama.
Ndërkohë, më herët u raportua se lista e kandidatëve për qarkun e Tiranës do të kryesohet nga inxhinierja Luljeta Bozo, ndërsa krahas saj po në Tiranë do të jetë edhe shefja e spitalit Infektiv, Najada Çomo.
Ndërkohë në Elbasan do të jetë ministrja e Arsimit Evis Kushi, ndërsa në Durrës ministrja e Bujqësisë Milva Ekonomi.
Në Kukës në krye të listës është Greta Duraku.
“Greta Duraku e cila do të jetë në vendin e parë në Kukës. Ajo është një vajzë e angazhuar prej vitesh në sektorin privat si drejtuese në kompani të ndryshme. Duke qenë se është paraqitur në platformë dhe performanca e saj ka qenë pozitive marr parasysh edhe opinionin e qytetarëve jo vetëm për këto që flas por edhe për shumë të tjerë kemi bërë matje të opinioneve”, tha Rama
Ndërsa në Korçë listën do e kryesojnë Eni Zake, pedagoge dhe anëtëre e Këshillit Bashkiak.
“Eni Zake është vendi i parë në Korçë. Administratore e fakultetit Fano Nolin në Korçë. Pedagoge prej shumë vitesh. Anëtare e Këshillit Bashkiak”, deklaroi Rama.
Ndërkohë në krye të listës së Gjirokastrës do të jetë Mirela Kumbaro, ndërsa në Lezhë do kryesojë Lindita Nikolla.
