Një aksident i rëndë ndodhi rreth orës 21:20 të së hënës në bulevardin “Bajram Curri”, pranë urës së “Bllokut” në Tiranë. Dy të rinj që udhëtonin me motor janë rrëzuar duke humbur jetën. Viktimë e këtij aksidenti ka mbetur këngëtari 22-vjeçar Ergi Dini, fitues i spektaklit të talenteve “X Factor” në Tv Klan. Është ndarë nga jeta edhe shoku i tij Kejdi Halili 21-vjeç. Ata janë transportuar në spital, por kanë ndërruar jetë rreth orës 21.50 për shkak të dëmtimeve të marra. Grupi hetimor në vendin e ngjarjes po kryen veprimet hetimore.
