Burime konfidenciale për Boldnews.al konfirmojnë se deputeti Agron Duka pritet të largohet në ditët në vijim nga Partia Republikane e Fatmir Mediut.
Kjo lëvizje e Dukës vjen si rrjedhojë e pakënaqësive që ka me Mediun, të nisura që nga zgjedhjet e 21 qershorit 2015. Asokohe Agron Duka kërkonte kandidimin për Bashkinë e Durrësit nën siglën e Partisë Demokratike, por kjo u refuzua nga Lulzim Basha. Për këtë refuzim, Mediu nuk bëri përpjekje për të plotësuar ambicjen e Dukës dhe kjo shkaktoi fërkimin e parë mes tyre.
Një tjetër përplasjes mes Dukës dhe Mediut ishin edhe zgjedhjet brenda Partisë Republikane. Duka kërkoi të merrte postin e kryetarit nëpërmjet zgjedhjeve, por kjo nuk u pranua nga Mediu.
Për këtë, burimet pranë Boldenews.al, shtojnë se, Agron Duka ka mbyllur negociatat me Lefter Xhuvelin dhe do të marrë drejtimin e Partisë Agrare Ambjentaliste. Duke qënë se ka një profil bujqësor, kjo zgjedhje e Dukës nuk është e pamenduar. Kjo pasi deputeti i zonës së Shijakut synon të drejtojë një parti për zgjedhjet e 2017 duke refuzuar për të qënë pjesë e ofertave për t’iu bashkuar PD, PS apo LSI.
Aktualisht PAA e Lefter Xhuvelit është në opozitë dhe nuk dihet nëse në drejtimin e ri të Agron Dukës do të mbajë ose jo të njëjtën linjë politike.
Xhuveli prej kohësh ka kërkuar të largohet nga politika për shkak edhe të moshës së tij, ndërkohë që ka miqësi të vjetër me Dukën që në kohën e qeverisë “Nano”.
Boldnew.al
