Sekretari i Përgjithshëm i Partisë Demokratike, Gazment Bardhi, në ‘A Show me gazetarin Adi Krasta ka dhënë detaje lidhur mbi atë çfarë po ndodh me listën për deputetë të PD si edhe arsyet përse nuk po shpallet qeveria hije nga kreu Basha.
‘Në fakt kanë qenë ditë pune të lodhshme por edhe të trishtuara për mua për shkak të gjendjes që kam gjetur në qarkun e Elbasanit.
Kam gjetur një nivel të tillë varfërie që do të trishtontë gjithësecilin që ka zemër dhe mend që kur takon ata banorë të qarkut të Elbasanit që jo vetëm janë braktisur nga qeveria, por janë edhe nën nevojat që kanë për të mbijetuar dhe nuk gjejnë asnjë mbështetje.
Kam marrë edhe mesazhe të qarta në qarkun e Elbasanit, të momentit unik të qytetarëve për bashkim dhe nevojës së qytetarëve për ndryshim dhe alternativës serioze të Partisë Demokratike.’
Bardhi u përgjigj edhe pyetjes pse akoma akoma kreu Basha nuk ka zbuluar qeverinë hije.
‘Së pari është kompetencë e kryeministrit të ardhshëm, Lulzim Basha, që ta zbulojë qeverinë hije. Është e drejtë e tij dhe do të prezantohet pas zgjedhjeve të 25 prillit. Sigurisht brenda PD ka figura që janë në vijën e parë të betejave përsa i përket fushave të ndryshme dhe nuk ka vetëm një alternativë por janë disa alternativa dhe është një vendimmarrje e kryeministrit të ardhshëm z.Basha.’
Bardhi dha një përgjigje edhe për afatin se ku do të shpallen listat për kandidatë.
‘Nuk jemi vonë me listat, jemi brenda afateve që përcakton ligji. Listat e kandidatëve do të miratohen jo më shumë se java që vjen.
Sigurisht që listat e kandidatëve për deputetë duhet të jenë një ndërthurje midis prurjeve të reja dhe ruajtjes së kontributeve të secilit prej kolegëve në PD. Nga analiza ime të paktën deri tani me listën e drejtuesve politikë që janë miratuar nga kryesia e PD, ka figura me integritet që nuk kanë lidhje me korrupsionin dhe krimin.’
