Policia e Tiranës njoftoi se ka nisur procedimi penal për dy vajzat e Rifat Lalos, që denoncuan kushtet e trajtimit të babait të tyre në Spitalin Infektiv, ku dhe më pas ndërroi jetë.
Në njoftimin e policisë thuhet se dy vajzat kanë përhapur informacione të rreme, në një kohë kur për ngjarjen nuk është bërë asnjë ekspertizë mjekësore apo ligjore, dhe nuk ka dhënë një verdikt as prokuroria.
Në njoftimin e policisë thuhet se po vijojnë hetimet për rastin dhe materialet do t’i kalojnë gjykatës së shkallës së parë në Tiranë.
Dy vajzat e të ndjerit denoncuan publikisht mungesën e trajtimit në Infektiv të babait të tyre, i cili sipas denoncimiot ishte lënë në karrige. Ndërkohë QSUT në reagimin e saj ka hedhur poshtë pretendimet, duke u shprehur se pacienti kishte shkuar në spital në gjendje të rënduar shëndetësore dhe me saturime oksigjeni 70, ndërkohë që një prej mjekeve ka komunikuar çdo 15 minuta me familjarët.
NJOFTIMI ZYRTAR
Specialistët e Komisariatit të Policisë Nr. 4 filluan procedimin penal ndaj shtetaseve E. L. dhe I. L., sepse nëpërmjet rrjeteve sociale dhe medias së shkruar, kanë përhapur informacione të rreme për shtetasen M. Q., me detyrë mjeke. Punohet për sqarimin e rrethanave të ngjarjes.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
