Specialistja e programit të vaksinimit në ISHP, Iria Preza gjatë një interviste të dhënë për Fax News ka treguar se shenjat të cilat mund të vijne pas vaksinimit janë njëlloj si vaksinat e zakonshme, te tilla si dhimbje në vendin e injektimit, pak temperaturë, por mund të ketë edhe lodhje.
Sipas Prezës personat të cilat marrin vaksinën në dy apo tre ditët e para duhet të jenë vigjilent nëse ju shfaqet ndonjë shenjë që i shqetëson.
Preza ndër të tjera tha se në Shqipëri doza të tjera të vaksinës pritet të vijnë në fund të muajit shkurt në fillim të muajit mars dhe sipas saj procesi i vaksinimit është një proces që do të zgjasë për muaj të tërë.
Ndërsa në lidhje me vaksinimin e fëmijëve ajo u shpreh se akoma nuk ka një vaksinë të tillë.
“Procesi i vaksinimit të shikohet në qoftë se kemi edhe efekte të padëshiruara pas vaksinimit. Deri tani nuk kemi pasur efekte të padëshiruar akute, të rënda, kemi pasur disa efekte të padëshiruara siç është dhimbje në vendin e injeksionit, pak temperaturë, mbase pak rëndes, por si lodhje këto janë shenja normale kur kryhet një vaksinë që tregojnë që organizmi po fillon të krijojë antitrupa.
Pas vaksinimit trupi fiton imunitetin e plotë edhe një javë pas dozës së dytë që fitohet mbrojtja e plotë që marrim nga vaksina. Personi në 2-3 ditë e para duhet të jetë i kujdesshëm për të parë si është ecuria, nëse ka ndonjë shenjë që e shqetëson.
Duke pasur parasysh se personat që e kalojnë covidin mund të fitojnë imunitet, por ka pasur raste që nuk kanë fituar imunitet. Koha minimale është një muaj nga kalimi i sëmundjes, gjithmonë duhet të kemi parasysh që jemi të rikuperuar.
Vaksinimi ofron mbrojtjen e tij më të madhe kur merret vaksinim i plotë pra me dy doza. Gjithmonë edhe pas dozës së parë edhe pas dozës së dytë nuk duhet të ulim vigjilencën tonë. Duhet të vazhdojmë të mbajmë maskat, të jemi të kujdesshëm për higjenën tonë.
Ne jemi në pritje të vaksinave në javët në vazhdim në fund të shkurtit në fillim të marsit do të jenë në dispozicion do të vazhdohet të vaksinohet grupet e riskut, moshat e treta dhe personeli mjekësor.
Ky është një proces që do të zgjasi për muaj të tërë, skema optimiste është prej 14 muajsh, por ky proces mund të zgjasë edhe më shumë.
Deri tani të gjitha vaksinat që janë në botë që përdoren në botë nuk janë përdorur tek fëmijët, për vaksinën e Pfizer nuk përdoret nën 16 vjec. Ka një kufi se për cilën mosh, nuk kemi një vaksinë për fëmijët” – u shpreh Preza.
