Bayern është vetëm 90 minuta larg historisë. Trajneri Hansi Flik ishte optimist në konferencën për shtyp duke thënë se skuadra e tij është gati për ta sjellë trofeun në shtëpi.
Kampionët e Evropës, do të përballen në orën 19:00 në finale e Kupës së Botës për klube ndaj ekipit meksikan, Tigres.
Formacioni- “Jemi të lumtur që kemi arritur në finale me një skuadër të plotë. Synimi ishte të vinim këtu dhe të shkonim në finale ku do të luajmë për gjithçka. Skuadra po mendon vetëm për trofeun. Djemtë janë të çlodhur dhe gati për të luajtur. Nuk e kam vendosur ende formacionin që do të hedh në fushë, pasi më parë do të më duhet të flas me lojtarët për të mësuar më shumë rreth formës së tyre.”
Kundërshtari- “Kam parë ndeshjen ndaj Palmeirasit. U impresionova nga loja e tyre. Kanë një skuadër me shumë lojtarë cilësorë të cilët vrapojnë shumë. Ndeshja do të jetë shumë e vështirë, ata nuk do të na e bëjnë të lehtë, për këtë jam i sigurt.
Në çdo ndeshje, por në veçanti në ato finale, është e rëndësishme ta nisim me takimin me sjelljen e duhur. Skuadra ka treguar se mund të përballet me këdo. Duhet të jemi vigjilentë, Tigres mund të na godasë në ço moment. Kanë një sulm të rrezikshëm, shënojnë shumë dhe gjithmonë janë një kërcënim. U kam kërkuar djemve që të jenë të pamëshirshëm dhe të shfrytëzojnë çdo rast në mënyrën më të mirë pasi në ndeshje të tilla janë episodet ato që vendosin. Kemi analizuar me kujdes kundërshtarin dhe jemi gati për të bërë një ndeshje të madhe ndaj tyre.”
