Kryeministri Edi Rama deklaroi sot nga Korça se nga dita e hënë do të fillojë furnizimi me vaksinat Pfizer. Rama pranoi se furnizimi do të nisë me një sasi më të vogël se ajo e premtuara, por sasitë do të vijnë duke u rritur shpejtë.
Më parë Kryeministri kishte deklaruar se dozat e Pfizer do të mbërrinin javën e 3-të të janarit, por ky premtim i tij, nuk u realizua.
Kreu i Qeverisë ka zgjedhur të largojë çdo përgjegjësi të tijën apo qeverisë lidhur me faktin se gënjeu javë më parë kur shprehej i sigurtë për mbërritjen e vaksinave nga Pfizer në janar dhe në shkurt, në total rreth 50 mijë doza.
Rama nuk bëri me dije se sa doza vaksinash do të mbërrinin të hënën, ndërsa në Shqipëri referuar deklaratave të mëparshme të Kryeministrit duhej të kishin ardhur 10750 doza vaksinash, ndërsa në shkurt mbi 32 mijë të tilla.
Kreu i Qeverisë nuk ka lënë mënjanë akuzat e tij ndaj BE lidhur me vaksinat anti-Covid, ndërsa u shpreh se “ia dolëm të dalim nga rrethimi ku u gjendëm pa dëshirë, dhe jo për fajin tonë bashkë me vendet e tjera të Ballkanit Perëndimor që u lanë jashtë skemës së shpërndarjes së vaksinave të BE”.
Ai tha se arritëm një kontratë me Pfizer në mënyrë të drejpërdrejtë, pa pritur që të vijnë vaksinat nga platforma e Covax-it.
“Do të duhet të kishin ardhur 10 mijë dozat e para në fund të janarit. Njësoj si me të tjerët Pfizer i shtyhu në kohë. Kemi marrë konfirmimin që do fillojë furnizimi nga Pfizer ditën e hënë. Shpresoj që të mos marrim një njoftim tjetër.
Do të fillojë me një sasi më të vogël se ajo e premtuara, por sasitë do të vijnë duke u rritur shpejt. Jemi afër dozës së dytë për ata që e kanë marrë. Në momentin që fillon furnizimi do të kemi mundësi ta shtrijmë në mënyrë të shpejtë për ju, mjekët dhe infermierët“, tha ai.
Po ashtu kryeministri deklaroi se: “Kemi negociata të avancuara më AstraZenecën, jemi jo larg finalizimit të një kontrate me AstraZenecën”.
Deri më tani në Shqipëri kanë ardhur vetëm 975 doza vaksinash, të cilat janë mbajtur sekret se nga cili vend kanë hyrë, duke ngritur mjaft dyshime mbi procesin.
