Ndërsa prej ditësh raportohen mijëra hektarë tokë nën ujë, për shkak të përmbytjeve, Kryeministri Edi Rama deklaroi se jemi në një fazë më pak kritike.
Sipas tij, problem janë rrëshqitjet e dherave në disa akse.
Për sa i përket tokave bujqësore që ndodhen në ujë, Rama deklaroi se janë minimale në raport me nga çfarë kanë qenë në përmbytjet e viteve të shkuara.
“Tani jemi në një fazë më pak kritike. Po e ndjekim me shumë vëmendje, por është krejtësisht në nivele të arsyeshme, duke pasur parasysh intensitetin e reshjeve.
Problemi kryesor janë rrëshqitjet e dheut në disa akse ku po punohet. Sa i përket përmbytjeve të tokave, ato janë minimale në raport me intensitetin e reshjeve. Jemi në ndjekje të vazhdueshme të situatës dhe më pas do të bëjmë publik edhe bilancin”, u shpreh kryeministri Rama.
Në fakt nga raportimet përmbytjet kanë përfshirë jo vetëm veriun e vendit, por edhe Shqipërinë e mesme dhe atë të Jugut. Nga raportimet janë me mijëra hektarë tokë të përmbytura, ndërsa uji ka pushtua edhe banesat dhe mjedise biznesi në zona të caktuara.
