Pavarësisht se Kryeministri Edi Rama nxitoi ta paraqesë skandalin në spitalin “Shefqet Ndroqi”, ku një sanitare mashtronte pacientët duke u hequr si infermiere dhe i merrte shuma të mëdha pvr t´u kujdesur për pacientët që trajtoheshin në këtë spital për Covid-19, Prokuroria e Tiranës, do të marrë në pyetje mjekë e infermierë të këtij spitali për të hedhur më shumë dritë mbi skandalin e korrupsionit.
Në kuadër të verifikimeve që Prokuroria e Tiranës po kryen për të parë nëse në skandalin e sanitares së spitalit “Shefqet Ndroqi” janë të përfshirë emra të tjerë, akuza ka sekuestruar librin e shërbimeve për të parë se si ishin të ndara turnet dhe kush mjek dhe infermeier ka pasur për detyrë të kujdesej për mamanë e denoncueses.
Nga raportimet mësohet se Prokuroria ka marrë kartelën e mjekimeve që i janë bërë pacientes për ta krahasuar me recetat e ilaçeve që i janë bërë.
Kjo sipas burimeve do të shërbejë për të vërtetuar nëse pacientes i janë dhënë të njëtat medikamente, që sanitarja i kërkonte denoncueses së këtij rasti të rëndë. Gjithashtu, prokuroria është duke administruar provat për të gjitha denoncimet e bëra publike pas rastit të Tire Alldervishit.
Organi i akuzës është duke këqyrur të telefonin e sanitares për komunikime të tjera për të parë nëse kemi të bëjmë me një skemë zhvatje. Pas këtyre verifikimeve do të nis edhe marrja në pyetje e individëve, mjekë apo infermierë, nëse rezultojnë në këto komunikime.
Gjithashtu janë sekuestruar dhe disa kamera sigurie në këtë spital për të parë nëse sanitarja apo personel i këtij spitali janë takuar apo i kanë marrë ryshfet pacientëve të tjerë të spitalit.
Tire Alldervishi u arrestua pasi në një prej emisioneve investigative u denoncua se si ajo i kishte marrë vajzës së një pacienteje 8 mln lekë për t´u kujdesur për nënën e saj. Pacientja ishte shtruar në këtë spital në muajt nëntor-dhjetor, ku edhe ndërroi jetë. Nga mesazhet zbardhet një skemë e tmerrshme, ku sanitarja, jo vetëm që nuk i shërbente pacientes, por e linte edhe pa ushqim.
