Prej muajsh në Shqipëri trumpetohen masat anti-Covid, ndërsa policia raporton çdo ditë vendosjen e gjobave për mosmbajtjen e maskave në ambiente të hapura.
Janë me qindra qytetarë që çdo ditë gjobiten, madje thuhet se gjoba i vendosen edhe lokaleve që organizojnë festa apo evente që bien ndesh me rregullat anti-Covid.
Video e mëposhtme është postuar në rrjetet sociale nga ish-ministri i Shëndetësisë, Ilir Beqaj, dhe në të shfaqet një festë e organizuar në një prej lokaleve në qendër të Tiranës, sikundër shkruan ai.
“Ndjesë çdo vajze apo djali, gruaje apo burri, që mund t’i kem cënuar privatësinë duke bërë publike këto pamje se si janë argëtuar mbrëme. Por janë në moshë madhore dhe janë të vetdijshëm për shkallën e (mos)zbatimit të ligjit. Cënimi i rregullave të caktuara për ruajtjen shëndetit nga kërcënimi i Sars-Cov-2 është moralisht i papranueshëm dhe ligjërisht i dënueshëm. Për më tepër, “serbesllëku” i shkeljes së ligjit në qendër të Tiranës është ofendues për këdo që zbaton ligjin”, shkruan Beqaj.
