Njëqind pacientë shqiptarë do të trajtohen falas në Turqi. Kjo përcaktohet në marrëveshjen e nënshkruar sot mes Ministrive të Shëndetësisë së Turqisë dhe Shqipërisë, për forcimin e bashkëpunimit në fushën e shëndetësisë.
Dr.Fahrettin Koca, ministri i Shëndetësisë së Turqisë, tha se kjo marrëveshje ka për qëllim të mbështesë dhe përmirësojë shkëmbimin e njohurive, përvojës, shërbimeve dhe teknologjisë midis dy vendeve, për të forcuar sistemet dhe politikat shëndetësore, përmes praktikave të përparuara akademike dhe shkencore.
Bashkëpunimi mes dy vendeve në fushën e shëndetësisë përfshin edhe shkëmbimin e eksperiencve dhe bashkëpunimit, në forcimin e sistemeve të kujdesit shëndetësor, shëndetin publik, shkëmbimi i njohurive e përvojave mbi barnat, pajisjet mbrojtëse dhe vaksinat, në lidhje me përgjigjen ndaj pandemisë COVID-19.
Marrëveshja mes dy Ministrive të Shëndetësisë do të shtrihet edhe në bashkëpunimin për sistemet dhe teknologjitë e informacionit shëndetësor, statistikat, sistemet e menaxhimit të informacionit spitalor, në shërbimet e akreditimit dhe kontrollit të cilësisë, në farmaceutikë, pajisje mjekësore, vaksina, bioteknologji, etj.
Një pikë tjetër e rëndësishme e kësaj marrëveshje është bashkëpunimi në emergjenca, fatkeqësi natyrore dhe zhvillimi i projekteve të përbashkëta të punës si organizimi i përbashkët i javëve shëndetësore , forumeve të biznesit shëndetësor etj.
