Gjykata Kushtetuese ka shfuqizuar pikat për llogaritjen e kompensimit të pronave. Sipas Gjykatës Kushtetuese, neni 6, pikat 3 dhe 5 janë anti-kushtetuese.
Gjykata Kushtetuese shfuqizon pikat për llogaritjen e kompensimit të pronave
Ky ligj ishte mbrojtur nga kryeministri Edi Rama, por edhe ministri Ylli Manjani.
Por ky ligj hasi kundërshtimin e Presidentit Nishani, një grupi deputetësh, Avokatit të Popullit, Partisë Republikane të Shqipërisë, Shoqatës “Pronësi me Drejtësi” dhe disa shoqatave të tjera, që kërkuan “shfuqizimin, si të papajtueshëm me Kushtetutën e Republikës së Shqipërisë, të ligjit nr.133/2015 “Për trajtimin e pronës dhe përfundimin e procesit të kompensimit të pronave”.
Kështu, Gjykata Kushtetuese ka vendosur, “Shfuqizimin si antikushtetues të nenit 6 pika 3 dhe pika 5 të ligjit nr.133/2015 “Për trajtimin e pronës dhe përfundimin e procesit të kompensimit të pronave”.
Konkretisht bëhet fjalë për nenin që përcakton metodologjinë e vlerësimi, ku shfuqizohet pika 3 që thotë se “Në rastet kur subjektet e shpronësuara kanë përfituar me vendim kthimi dhe kompensimi, diferenca e llogaritur, sipas shkronjës “b”, të pikës 1, zbritet nga vlerësimi i pronës së njohur për kompensim, e llogaritur sipas shkronjës “a”, të pikës 1, të këtij neni”.
Ndërsa pika 5 që është shfuqizuar thotë se “në rast se ATP-ja merr vendim për njohje dhe kompensim fizik në pronën e subjektit, prona vlerësohet sipas pikës 1 të këtij neni.
Kur nga ky vlerësim rezulton se subjekti përfiton një pronë që ka vlerë më të lartë sesa prona që ka pasur në momentin e shpronësimit, atëherë subjektit i kompensohet fizikisht sipërfaqja që i korrespondon vlerësimit dhe pjesa tjetër e pronës kalon në fondin e tokës me vendim të ATP-së”.
Po ashtu, Gjykata ka vendosur refuzimin e kërkesës për shfuqizimin e nenit 6 pika 1 shkronja “ b” dhe nenit 7 pika 2 shkronja “a” dhe “b” të ligjit të mësipërm dhe rrëzimin e kërkesës për pjesën tjetër.
