Kuvendi do të mblidhet sot në orën 17:00 në një seancë të jashtëzakonshme për dekretimin e ministrave në kabinetin qeverisës.
Kryeministri Edi Rama i ka dërguar një letër zyrtare kryetarit të Kuvendit, Gramoz Ruçi duke i kërkuar që të mbledhë ligjvënësit në një seancë të jashtëzakonshme, me qëllim shqyrtimin e dekreteve të shkarkimit dhe të emërimit të ministrave, brenda afatit të përcaktuar në pikën 2 të nenit 98 të Kushtetutës.
Në orët e fundit të 2020, Kryeministri Edi Rama vendosi të ndryshojë dy nga ministrat në kabinetin qeveritar. Kështu ai hoqi dorë nga posti i ministrit të Jashtëm që e mbante prej 1 viti, ndërsa emëroi Olta Xhaçkën në këtë pozicion.
Në vend të Xhaçkës te Ministria e Mbrojtjes, Rama vendosi të emërojë Niko Peleshin, ish-zv.Kryeministër dhe ish-ministër i Bujqësisë. Prej kohësh Peleshi qëndronte në hije, pas largimit nga Qeveria, edhe pse ishte drejtues i Qarkut të Korçës.
Në javën e dytë të dhjetorit 2020, Rama u detyrua të ndryshojë edhe dy ministra. Kvshtu pas largimit të Sandër Lleshaj, Kryeministri vendosi Bledi Çuçin si ministër të Brendshëm, ndërsa te Ministria e Bujqësisë emëroi Milva Ekonomin.
Rendi i ditës:
– Hapja e sesionit të jashtëzakonshëm të legjislaturës së IX të Kuvendit të Shqipërisë.
1. Dekret i Presidentit të Republikës nr. 11.889, datë 31.12.2020 “Për shkarkim ministri”.
2. Dekret i Presidentit të Republikës nr. 11.890, datë 31.12.2020 “Për shkarkim ministri”.
3. Dekret i Presidentit të Republikës nr. 11.891, datë 31.12.2020 “Për emërim ministri”.
4. Dekret i Presidentit të Republikës nr. 11.892, datë 31.12.2020 “Për emërim ministri”.
