Një krim i dyfishtë ka tronditur Tiranën paraditen e sotme, ndërsa viktima kanë mbetur dy motra, njëra prej të cilave bashkëjetonte me autorin, një shqiptar i Maqedonisë.
Nga raportimet mësohet se viktimat janë identifikuar si shtetaset Kristina Bardhi dhe Zhaneta Metani, rreth 40 vjeç.
Autori i krimit është identifikuar si Përparim Ademi, 59 vjeç, ndërsa dyshohet se ai përdor edhe një tjetër mbiemër. Mësohet se autori ka ndryshuar emrin para disa vitesh, ndërsa më parë e ka pasur Tela.
Policia ka gjetur në vendin e ngjarjes edhe njolla të tjera gjaku, që dyshohet se i përkasin autorit, duke shtuar dyshimet se ai mund të jetë plagosur ose vetëplagosur.
Nga raportimet mësohet se pas krimit autori është larguar, ndërsa janë njoftuar pikat e kalimit kufitar, për faktin se ai mund të tentojë të largohet nga Shqipëria.
Krimi raportohet se ka ndodhur pas një konflikti mes autorit dhe bashkëjetueses së tij. Burimet shprehen se shkak i konfliktit është bërë fakti se bashkëjetuesja nuk ka dashur më të vazhdojë lidhjen me autorin, gjë që duket se nuk është pranuar prej tij.
Autori ka qëlluar me armë automatike disa herë ndaj viktimave, ka lënë armën në vendin e krimit dhe është larguar në këmbë. Dëshmitarë të ngjarjes janë dy fëmijë të mitur të viktimës së identifikuar si Zhaneta Metani, të cilët kanë njoftuar policinë, lidhur me ngjarjen e rëndë.
