Ditën e sotme luhet supersfida mes Tiranës dhe Vllaznisë ose e njohur ndryshe si Klasikja e Shqipërisë. Në “Selman Stërmasi” duke filluar nga ora 13:45, skuadrat do të tentojnë fitoren, rezultat shumë i rëndësishëm ky për vijueshmërinë e kampionatit.
Bardheblutë do të shpresojnë që të rigjejnë rrugën e fitoreve pas 3 barazimeve radhazi. Për këtë përballje, trajneri Dede do të jetë në dyshime deri në momentin e fundit sa i përket formacionit. Agustin Torasa vijon të mbetet shqetësim për kryeqytetasit, teksa nuk ka qenë në gjendje të bëjë stërvitje të plotë.
Siç ka ndodhur zakonisht këto javë, argjentinasi teston veten ditën e ndeshjes dhe nëse ndihet në rregull, i jep mundësinë trajnerit që ta llogarisë në fushë. Kësisoj, Dede do të shpresojë që të ketë të njëjtën skuadër si ndaj Teutës, me ndryshimin që në mesfushë të kthehet Toli titullar përkrah Bathës.
Nga ana tjetër, Kuqeblutë e Brdariç, shpesh edhe të kushtëzuar nga organika, kanë qenë të lexueshëm për zgjedhjet që hedhin në fushë, por aspak të ndalshim deri më tani.
Tekniku Brdariç nuk duket se do të ndryshojë asgjë nga formacioni të cilin hodhi në fushë në takimin e fundit ndaj Skënderbeut. Tekniku pritet që t’i besojë të njëjtës 11-she me Zogoviç në portë dhe para tij treshja Gurishta, Adili e Imami. Në mesin e fushës pritet të rreshtohen në sistemin me pesë, Imeri, Krymi, Marku, Jonuzi e Isaevski. Në majën e sulmit do të vendosen Dilver, i mbështetur edhe nga Ardit Hoxhaj.
Formacionet e mundshme:
Tirana: 3-5-2: Bekaj, Toshevski, Najdovski, Hoxhallari, Halili, Vrapi, Batha, Toli, Ismajlgeci,Torasa, Muçi
Vllaznia: 3-5-2: Zogovic, Gurishta, Adili, Imami, Imeri, Krymi, Marku,Jonuzi, isaevski, Hoxhaj, Dilaver
