Ministrja e Shëndetësisë, Ogerta Manastirliu, nuk ndalet së bëri propogandë dhe show. Ndërsa vendi prej 9 muajsh përballet me pandeminë e Covid-19, kur jemi të fundit përsa i takon testimeve dhe për rrjedhojë edhe gjurmimit dhe kontrollit të pandemisë, kur ende nuk kemi një datë të saktë se kur do të nisin vaksinimet dhe cila është vaksina, Manastirliu vijon propogandën.
Madje duke mos u ndalur. Pasi përdori mjekët, pasi përdor çdo pacient të shtruar në spital, për të treguar mrekullinë që ndodh atje, sot Manastirliu ka përdorur fëmijët, madje ata që janë jetimë.
Duke shfrytëzuar festat e fundvitit, Manastirliu ka shkuar në një vizitë në shtëpinë e fëmijës “Zyber Hallulli”.
“Më lejoni t’ju falenderoj dhe t’ju uroj nga zemra Gëzuar Vitin e Ri. Shumë faleminderit për gjithë punën që bëni. Me të vërtetë meritoni shumë më shumë. E di që keni sakrifikuar shumë përgjatë gjithë këtyre muajve. Keni ndenjur pa parë familjet tuaja duke qenë se keni qëndruar këtu në shtëpinë e “Zyber Hallulli”. Megjithatë keni bërë një punë famtastike. Një punë që e bëni çdo vit në fakt. Por ky ka qenë një vit jo i zakonshëm, edhe ka kërkuar sakrifica nga të gjithë”, tha Manastirliu.
Që një ministre të shkojë dhe të vizitojë shtëpitë e fëmijëve apo ato të moshës së tretë nuk ka asgjë të keqe. Sikundër nuk ka asgjë të keqe që mund të shpërndash dhurata për kategori të caktuara. Problemi nis kur veprimin e propogandon, bën show-n e rradhës, dhe ndoshta përdor situata të tilla për të ndrequr imazhin. Në rastin konkret, ministrja e dështuar e Shëndetësisë, do të ishte më mirë të harxhonte kohën për të siguruar vaksinat, qoftë edhe për ato kujdestaret apo punonjëset e këtyre institucioneve, se sa të shfaqej me disa pako në duar, 1 herë në vit.
