Robert Lewandowski u shpall zyrtarisht si lojtari më i mirë në botë për vitin 2020. Sulmuesi polak, la pas Cristiano Ronaldon dhe Lionel Messin duke fituar çmimin prestigjioz.
Lewandowski, 32 vjeç, prej kohësh e ka konsoliduar veten si një goleador i vërtetë por nëse nuk do të kishte qenë për një shpërthim vullkanik 10 vjet më parë, karriera e tij mund të kishte marrë një rrugë tjetër.
Në prill të vitit 2010, Blackburn Rovers ia kishte vënë sytë talentit, atëherë 21-vjeçar dhe që luante për Lech Poznan. Marrëveshja ishte afër përfundimit, dhe gjithçka që mungonte ishte që Lewandowski të udhëtonte në Angli për të finalizuar kushtet.
Por shpërthimi i vullkanit Eyjafjallajokull në Islandë ndaloi udhëtimin në Evropë.
“Nuk mund të fluturoja për në Blackburn për shkak të vullkanit, por doja të shkoja për të parë se si ishte klubi,” tha Lewandowski në atë kohë. “Sikur të kisha shkuar, të kisha parë klubin, stadiumin dhe gjithçka tjetër, me siguri do të kisha firmosur”.
Lewandowski më pas u bashkua me Dortmund dhe, nën drejtimin e Jurgen Klopp , karriera e tij shpërtheu duke u vënë në qendrën e vëmendjes nga klubet e mëdha.
Dhjetë vjet pas këtij shpërthimi, Lewandowski, shpallet lojtari më i mirë në botë me skuadrën e Bayern Munich duke arritur ëndrrën e tij.
