Prej javësh po aplikohen masat anti-Covid të propozuara nga Komiteti Teknik i Ekspertëve, që kufizojnë tubimet, protestat, mbledhjet e partive, festat apo çdo grumbullim tjetër me mbi 10 persona.
Kjo vlen si në ambientet e hapura ashtu edhe në ato të mbyllura.
Por duket se Policia e Ardi Veliut nuk pyet për masa, edhe pse çdo ditë raportojnë se gjobisin qytetarë për një maskë, se kapen jashtë orës policore duke ecur në rrugë, apo se organizojnë festa apo dreka familjare mbi numrin që lejon Komiteti i Ekspertëve.
Por kjo nuk vlen për policinë, e cila përgjatë ditëve të fundit, edhe në emër të masave anti-Covid, hodhi gaz lotsjellës dhe ujë me presion, përdori dhunën dhe forcat special, për të shpërndarë protestat.
Foto, që është bërë virale në rrjet, tregon më së miri se në sallën ku janë mbledhur efektivët e policisë, nuk respektohet asnjë masë, as distance prej 2 metra sikundër këshillohet, madje as numri i kufizuar.
Nuk dihet nëse në rastin konkret do të aplikohen gjoba ashtu sikundër i vihen çdo ditë qytetarëve dhe nëse po kush do i gjobisë policët e Ardi Veliut?
