Detaje të reja mësohen nga vrasja e ndodhur mëngjesin e sotëm në fshatin Goraj në Kuçovë, ku një 41-vjeçar është ekzekutuar me armë zjarri.
Burime zyrtare nga policia njoftuan se “V.P. (Vangjel Polovina), 44 vjeç, banues në Kuçovë, në oborrin e një lokali në liqenin e fshatit Goraj, ka vrarë me armë zjarri për motive të dobëta shtetin A.G. (Ajet Guneli), 41 vjeç, pasi kishte debate të vazhdueshme dhe pretendonte se ai e ofendonte përditë”.
Sipas të njëjtave burime, “V.P. (Vangjel Polovina) i kishte marrë me qira një stallë derrash 41-vjeçarit dhe kishte mosmarrëveshje të vazhdueshme me të me të pasi pretendonte se qiramarrësi e shante dhe ofendonte përditë”.
Autori u vetëdorëzua
Më tej, në njoftim, thuhet se autori u vu në pranga “falë veprimeve të shpejta profesionale dhe hetimore, krehjes së zonës dhe reagimit të menjëhershëm” të efektivëve.
Konkretisht, policia njofton se, “shërbimet e Komisariatit të Policisë Berat, në bashkëpunim me strukturat hetimore të Drejtorisë Vendore të Policisë Berat dhe forcat e posaçme ‘Shqiponjat’, pas njoftimit të marrë se tek liqeni në afërsi të fshatit Goraj të Beratit kishte ndodhur një vrasje me armë zjarri, menjëherë kanë shkuar në vendngjarje. Falë veprimeve të shpejta profesionale dhe hetimore, krehjes së zonës dhe reagimit të menjëhershëm duke rrethuar zonën në një perimetër të gjerë, bënë të mundur kapjen dhe arrestimin e autorit të dyshuar të ngjarjes, shtetasin: V.P. (Vangjel Polovina), 44 vjeç, banues në Kuçovë”.
E vërteta është ndryshe nga ajo që njoftohet zyrtarisht. Burime konfiendicale pranë policisë lokale, bënë me dije se autori ka shkuar vetë në komisariatin e Policisë së Kuçovës dhe është vetëdorëzuar. Të njëjtat burime shtuan se në dëshminë e parë të dhënë para uniformave blu, ai ka deklaruar se e kreu vrasjen pas një konflikti për një borxh.
Pra, vënia në pranga e autorit ka ardhur pasi ai është vetëdorëzuar dhe jo falë “reagimit të menjëhershëm” të policisë, siç hiperbolizohet në njoftimin e zyrës së shtypit pranë Drejtorisë së Policisë së Beratit.
Të tilla njoftime në fakt nuk bëhen për herë të parë nga policia, që shtrembëron rrethanat e ngjarjeve për të propaganduar për suksese imagjinare.
/BoldNews.al/
