Këshilli i Europës dënoi sot dhunën policore ndaj qytetarëve që protestuan pas vrasjes së 25-vjeçarit Klodian Rasha nga një efektiv policie.
Lidhur me qëndrimin e KiE ka reaguar Partia Demokratike, e cila përmes ish-deputetit Gent Strazimiri, shprehet se Dhuna ka emër, quhet, Edi Rama!
“Evropa njëzëri, në nivel legjislativ dhe ekzekutiv ka dënuar dhunën policore ndaj protestuesve dhe gazetarëve.
Është një grusht frontal në fytyrën e pafytyrë të Edi Ramës e në barkun e tij të pangijshëm!
Është akuzë evropiane drejtpërdrejt ekzekutorëve të dhunës policore sistemike, me plan masash dhe plane operacionale, për Ardi Veliun dhe cilindo prej atyre që kanë vënë firmat nën to!”, shprehet Strazimiri.
Në vijim, referuar kallëzimit penal në SPAK të kryepolicit Ardi Veliu, Strazimiri tha se ai duhet të përgjigjet edhe për mbrojtjen kriminale ndaj policit vrasës, fshehjen kriminale të dinamikës së ngjarjes përmes komunikata zyrtare të policisë, dezinformimin kriminal të opinionit publik në lidhje me personalitetin e viktimës.
“Deri tani përgjegjësia penale ka emër dhe quhet Ardi Veliu & co! Dhuna ka emër dhe quhet Edi Rama!”, shprehet Strazimiri.
