Vera që lamë pas ishte e trazuar për Leo Messin. Sulmuesi argjentinas i paraqiti Barcelonës kërkesën për tu larguar nga klubi, ndërsa shumë skuadra me në krye Man.City-n prisnin me padurim negociatat me 33-vjeçarin.
Gjithsesi, në atë kohë, sulmuesi ra dakord ta linte çështjen mënjanë deri në fund të sezonit duke vendosur të qëndrojë te Barcelona. Megjithatë e ardhmja e tij afatgjatë në klub mbetet e paqartë. Një nga faktorët që do të përcaktojë nëse ai mbetet në “Camp Nou” përtej skadimi i kontratës së tij është forma e tij dhe e ekipit.
Marrëdhënia e tij me Koeman ka nisur mirë dhe kjo është thelbësore për të ecur përpara. Faktori kryesor, megjithatë, për sa i përket të ardhmes së Messit do të jetë ai që zëvendëson Josep Maria Bartomeu në zyrën e presidentit.
Një president i ri do të zgjidhet në vitin e ri dhe projekti i tyre sportiv do të duhet të bindë “pleshtin” të qëndrojë. Messi dëshiron të dijë se çfarë do të ndodhë në dy vitet e ardhshme në lidhje me pozicionin e drejtorit sportiv, trajnerin e skuadrës dhe politikat e transferimeve të klubit.
Ashtu siç raportojnë mediat spanjolle, Messi do të marrë një vendim për të ardhmen e tij verën e ardhshme. Këtë periudhë kohe ai do të monitorojë gjendjen e ekipit në fushë dhe jashtë saj.
