Kreu demokrat Lulzim Basha tha se numri i fataliteteve këtë javë është shumë më i lartë se shifrat që jepen. Gjatë një takimi me mjekë, Basha tha se ka informacione për dhjetra raste që nuk raportohen nga Ministria e Shëndetësisë.
Sipas kreut demokrat, situata është mjaft e rëndë.
Një prej mjekëve të pranishëm në takim, Mirgen Zacellari, tha se mjekët e familjes nuk kanë aparate që mund të masin nivelin e oksigjenit të një pacienti.
“Lind nevoja për të bërë tamponë apo skaner, ndërkohë që koha për përgjigjen e tamponit shkon deri në 7 ditë”, tha mjeku. Sipas tij, tamponi mund të kapë virusin maksimumi në 5 ditët e para.
“Ne referojmë rastet dhe ISHP shkon për të marrë tamponin në shtëpinë e pacientit”, tha ai.
Mjekët theksuan se rastet janë aq të shumtë sa detyrohemi t’i dërgojmë në spitale private për të bërë skanerin.
“Në qëndrat shëndetësore nuk bëhet asnjë analizë që zbulon praninë e COVID. 5 ditë pas fillimit të simptomave tamponi nuk vlen si metodë testimi”, u shpreh mjekja Elisabeta Musta.
Sipas saj, në një rast konkret, pacienti u paraqit më 21 tetor, më 26 tetor është testuar dhe rezultati doli më 2 nëntor. Ajo shtoi se bashkëshortes së këtij pacienti nuk i bënë tamponin me argumentin se ajo kishte nisur mjekimin.
