Deputeti Lefter Maliqi shprehet se dy njerëzit që vlerëson sot në politikë janë lideri Sali Berisha dhe Presidenti Ilir Meta. Maliqi tha mbrëmjen e djeshme në studion e Oranes, se lufta mes Kryeministrit Edi Rama dhe Presidentit Ilir Meta, do të ketë një fitues, i cili padyshim që do të jetë Kryetari i Shtetit.
Maliqi tha se “nuk do të ishte kjo luftë politike mes Ramës dhe Metës nëse President nuk do të ishte ky i fundit por do të ishte një emër tjetër”. Deputeti tha se Rama e shikon Metën si një pengesë ndaj dhe nisi luftën që në 2017 me atë paktin e fshehtë.
“Qëllimi i Ramës është goditja e Metës për t’u kthyer në një Erdogan. Me këto heqje dhe kufizime që Rama po tenton t’i bëjë Ilir Metës, mund t’ju them se këtij të fundit nuk i shkon kostumi i Presidentit”, tha Maliqi. Sipas tij, Rama e shikon Metën si një rrezik, ndaj edhe ka nisur sulmet ndaj Presidentit.
Ndërkohë për ish-Kryeministrin Sali Berisha, deputeti Maliqi tha se është politikani që çeli negociatat me BE, anëtarësoi Shqipërinë në NATO, bashkoi Shqipërinë dhe Kosovën përmes rrugës së Kombit, luftoi krimin e organizuar dhe bandat. Maliqi tha se i është mirënjohës liderit Berisha për investimet që realizoi gjatë qeverisjes së tij në Qarkun e Beratit, në të gjitha fushat.
“Sot Berati ka investimet e qeverisë Berisha, lidhi fshatrat me njëra-tjetrën duke ndërtuar rrugët. Investoi në arsim dhe kulturë, ndihmoi fermerët, ndaj dhe sot jo vetëm të djathtët, por edhe të majtët në qarkun e Beratit, i janë mirënjohës”, tha Maliqi.
