Nga Boldnews.al
Kryesia e Partisë Socialiste vendosi dje njerëzit që do të merren me zgjedhjet e ardhshme parlamentare.
Në organizimin e ri bie në sy largimi i “komisarit” të jugut Koço Kokëdhima që mbulonte qarqet Vlorë-Gjirokastër.
Edhe pse Kokëdhina mbrëmë në emisionin “Opinion” tentoi të bënte paqe me kryeministrin Edi Rama, ky i fundit nuk ia ka falur ish-mentorit të tij kritikat për qeverinë dhe kryesisht ndaj ministrit Saimir Tahiri.
Kështu vendin e Kokëdhimës në këtë qark e ka zënë i besuari i ri i Ramës, Damian Gjiknuri.
Ministri i Brendshëm Saimir Tahiri do të jetë koordinator për qarkun e Tiranës. Tahiri ka marrë urdhër të prerë nga Rama që të bashkëpunojë nga afër me kryebashkiakun Erion Veliaj. Tahiri dhe Veliaj prej kohësh kanë një përplasje të fortë mes tyre.
Ndërkohë bie në sy largimi i Ditmir Bushatit nga Tiranë në Shkodër. Burime brenda selisë rozë thonë se Bushati nuk e ka marrë pozitivisht këtë vendim. Edhe pse është vendlindja e tij, Bushati ndihej komod në Tiranë, ndërkohë që Shkodra është një zonë e vështirë për të majtën.
Ndërkohë që një “internim” tjetër është edhe ai i Ilir Beqjas në Kukës. Nuk kuptohet pse kryeministri ka çuar në këtë bastion të djathtë një ndër ministrat më të akuzuar për korrupsion.
Bie në sy përjashtimi i Pandeli Majkos nga ekipi drejtues. Ashtu si në zgjedhjet e vitit 2013, Majko nuk do të jetë drejtues fushate. Duket se Rama nuk e llogarit Majkon si njeri të besuar të tijin, por që e përdor si gaztor për të bërë për vete socialistët e vjetër dhe në këtë rast mund të përdorim edhe një batutë të një deputeti socialist që “Majko është thinjur duke qeshur”.
Të larguarin e madh nga PS, Ben Blushi, Rama e ka zëvendësuar në Elbasan me Taulant Ballën. Por edhe pse Balla përdoret shëmtuar nga Rama, emri i tij si koordinator i Elbasanit është vetëm zyrtarisht, pasi njeriu që do të drejtojë realisht fushatën në qarkun e Elbasanit është deputeti i PDIU-së, Aqif Rakipi.
Ky i fundit ka lënë në hije në këtë qark edhe deputetin Afred Peza, ndërkohë që ka një miqësi të ngushtë me kryeministrin Edi Rama.
Ndërsa njeriu i dytë më fuqishëm në selinë rozë, Gramoz Ruçi do të drejtojë sërish qarkun e Fierit, ndërsa ministri i Mirëqenies Sociale, Blendi Klosi, për qarkun e Beratit.
Bledi Çuçi është emërohet në Gjirokastër, Ministrja e Arsimit, Lindita Nikolla, do të drejtojë qarkun e Lezhës.
Gjithashtu, në Dibër do të jetë ministrja e Mbrojtjes, Mimi Kodheli. Vangjush Dako, kreu i Bashkisë së Durrësit do të jetë koordinator për qarkun e tij.
