Kryeministri Edi Rama ka folur në një bashkëbisedim me gazetarët ku u pyet për kabinetin qeveritar që do ti nënshtrohet vlerësimit online që do të bëhet në tre cikle nga qytetarët në platformën “Deputetët që duam”.
I pyetur nëse do të ndryshojë ministrat nëse do të ketë pakënaqësi nga qytetarët për të hyrë në zgjedhjet e 25 Prillit me ekip të ri, Rama u përgjigj se Këshillin e Ministrave e kemi të mirë, por e mira nuk ka asnjëherë fund.
“Patjetër që secili, unë i pari ka mundësi të bëj më shumë dhe duhet të kërkoj nga vetja çdo ditë e më shumë kështu që në kërkim të përditshëm për ta bërë më mirë punën dhe për ta bërë më mirë ka të bëjë dhe dëgjimi i njerëzve. Edhe si pasojë e eksperiencës kam arritur ta kem shumë funksional me dëgjimin aktiv me ata që ndërveprojnë me mua në Facebook, Twitter, Instagram më pak sepse kryesisht është Facebook pasqyra kryesore, në Whatsappin tim që është një hapësirë e jashtëzakonshme mesazhesh dhe për rrjedhorë gjithfarë mendjesh e mendimesh.
Ky dëgjim specifik i anëtarësisë është një vlerë e shtuar për të mësuar se cila është marrëdhënia, miqësia, shkalla e lidehje mes anëtarëve të familjes sonë politike dhe përfaqësuesve në cdo qark si dhe pasi të bëjmë këtë në ciklin e parë. Në ciklin tjetër do të shohim dhe anëtarët. Kjo është një fazë kolaudimi, është një proces i ri dhe të gjitha kodet personale të hyrjes në platformën tonë janë shpërndarë pjesa më e madhe e tyre, kanë filluar të veprojnë një pjesë e vogël ende dhe për këtë arsye i kemi dhënë vetes 45 ditë për këtë fazë të parë. Më pas do hyjmë në detaje të tjera dhe më pas do të rrisë intensivisht shërbimin online mes anëtarëve, deputetëve dhe përfaqësuesve për çështje specifike të zonave”, tha Rama.
