Kryeministri Edi Rama ka përfunduar mbledhjen me drejtuesit politikë të PS-së, në fundin e të cilës ka paralajmëruar Ilir Metën që të kalojë sa më parë ndryshimet në Kodin Zgjedhor, pasi nuk ka kohë për implemetimin e tyre, për zgjedhjet e 25 Qershorit.
“5 qershori është respektuar dhe 30 qershori është respektuar. Presidenti të kalojë sa më shpejt ndryshimet në Kod, s’ka kohën mirë ta firmos se koha për t’u implementuar është e shkurtër”, u shpreh Rama para gazetarëve.
Kur u pyet mbi planin me 5 pika për koronavirusin që Partia Demokratike i ka kërkuar qeverisë që ta zbatojë, Rama tha shkurt: “Nuk kam ide për asnjë plan me 5 pika”.
Mësohet se në mbledhje janë diskutuar përgatitjet lidhur me procesin e zgjedhjeve të 25 prillit, ndërsa drejtuesit politikë vijojnë të përcjellin vlerësimet mbi drejtuesit e institucioneve dhe funksionimin e tyre. Raportohet se gjithashtu po jepen vlerësimet edhe mbi aktivizimin e deputetëve aktualë të PS në raport me zonat që mbulojnë.
Më herët, presidenti Ilir Meta, i ka bërë apel edhe një herë tjetër kryeministrit Edi Rama që të respektojë marrëveshjen e “5 qershorit”, pasi sipas tij, nëse nuk e bën këtë gjë, “do të ketë jo vetëm një president “të shkalluar”, por edhe tre milionë shqiptarë “të shkalluar” që do shkallmojnë me votë dhe çdo mjet legjitim ëndrrat e tij për të blerë e trembur popullin shqiptar për një grusht oligarkësh e banditësh”.
