Kreu demokrat Lulzim Basha ka viojuar takimet me qytetarët për prezantimin e planit ekonomik, përmes të cilit synon të nxjerrë vendin nga kriza. Basha ishte në Laç nga ku premtoi dyfishimin e ndihmës ekonomike për familjet në nevojë.
Pasi ka dëgjuar problemet me të cilat përballen qytetarët, Basha tha se ato nuk zgjidhen duke i këshilluar njerëzit të mbajnë maskë dhe të lajnë duart.
“Edi Rama po e çon vendin drejt greminës. Kemi propozuar planin me 5 pika që qeveria duhet t’a zbatojë me urgjencë në muajt që i kanë mbetur në mënyrë që vendi të mos shkojë në fund të gropës.
Duhet mbështetje reale për biznesin, pensionistët dhe familjet shqiptare”, tha Basha.
Kreu demokrat e ka cilësuar situatën si të pashpresë, nëse qeveria nuk reagon shpejt dhe të vërë në zbatim planin e rimëkëmbjes të propozuar.
“Për bujqësinë ne kemi një plan, që plotëson nevojat tuaja dhe në të së pari është subvencioni, siç vepron Kosova dhe më tej, heqjen e “taksës Rama” mbi naftën. Këto sot janë plan, nesër do të jenë realitet. Na pret një betejë përpara që nuk do të jetë e lehtë. Sot ne kemi fjalën, nesër do të marrim vendimet tona sa ta largojmë këtë të keqe”, tha Basha.
