“Ka ende kohë për reflektim”, u shpreh Presidenti Ilir Meta nga Elbasani, duke i drejtuar një tjetër apel Kryeministrit Edi Rama, lidhur me ndryshimet e miratuara së fundmi në Kodin Zgjedhor. Sipas tij të gjithë janë të shqetësuar për zgjedhjet, përfshirë edhe BE i cili mezi pret çeljen e negociatave.
“Sa i takon cështjes së zgjedhjeve, meqë e keni me shumë shpejtësi dhe me të drejtë, është një shqetësim i përgjithshëm në vendin tonë dhe i vetë BE, i cili mezi pret çeljen e negociatave dhe plotësimin e disa detyrimeve. Le të punojmë të gjithë në shërbim të kësaj bashkëjetese, ka ende kohë për të reflektuar që secili do të jetë pjesë e kontributit të Shqipërisë Evropiane që është jo vetëm një objektiv, por do të jetë një realitet i pashmangshë, pavarësisht sfidave dhe vështirësive”, tha Meta.
Një ditë më parë, Presidenti paralajmëroi se do e rikthejë për shqyrtim në Kuvend ligjin mbi ndryshimet në Kodin Zgjedhor, ndërsa ka afat deri më 27 tetor për tu shprehur me një dekret.
Kreu i Shtetit u shpreh i shqetësuar për largimin e të rinjve nga vendi dhe kërkoi prej organeve kompetente të ofrojnë siguri në mënyrë që shqiptarët ta gjejnë qetësinë në Shqipëri. Këto deklarata Presidenti i bëri pasi ishte i ftuar nga Qendra e Bashkëpunimit Ndërfetar në Elbasan.
“Gjithë shqiptarët duhet t’i shpallin luftë largimit të të rinjve. Kjo kërkon forcimin e bashkëjetësës në vendin tonë në cdo komunitet. Unë sot jam në Elbasan sepse komunitetet dhe besimet në Elbasan janë shembull i bashkëpunimit.
Duhet ti japim më shume qetësi vendit, aq më tepër Elbasanit, i cili vuan nga problemet e sigurisë. Ti japim më shumë besim të rinjve për një të ardhme më të mirë këtu dhe të prekshme në një të ardhme të afërt. Kjo është e vetmja mënyrë që ne të realizojmë ëndrrën e të gjithë shqiptarëve që Shqipëria të jetë si gjithë Evropa”, tha Meta.
