KPK vendosi sot shkarkimin nga detyra të prokurores së Përmetit, Silvana Pani. Trupa e KPK që shqyrtoi çështjen përbëhej nga Roland Ilia kryesues, Firdes Shuli relatore dhe Etleda Çiftja anëtare.
Silvana Pani u përball me KPK në seancën e 1 tetorit, ndërsa u evidentuan probleme të shumta me pasurisë dhe një rast të dyshuar të konfliktit të interesit.
Blerja e një apartamenti në Përmet në vitin 2015 kundrejt vlerës 27 mijë euro u vlerësua nga KPK si pamundësi financiare, ndërkohë që u ngritën dyshime mbi mospërputhjen e çmimit të blerjes në kontratën e porositjes me atë të shitblerjes si dhe të deklarimeve për pagesën e kësteve.
Mungesë burimesh u konstatua edhe për blerjen e një autoveture dhe për shtesat në një depozitë të çelur në vitin 2003. Nga analiza financiare rezultoi mungesë burimesh financiare në vlerën e 11.8 milionë lekë.
KPK ngriti dyshime për konflikt interesi në tri procedura prokurorimi për furnizim me karburant të kryera nga Prokuroria e Përmetit, kur Pani, në cilësinë e drejtueses ka nënshkruar pagesat në favor të shoqërisë së vëllait të bashkëshortit të saj. Nga hetimi i KPK është zbuluar se prokurorja Pani dhe bashkëshorti i saj ishin pajisur me prokurorë të posaçme për kryerjen e veprimeve për llogari të kësaj shoqërie, raporton Birn.
Pani e konsideroi të padrejtë analizën financiare dhe pretendoi se të gjitha të ardhurat e familjes së saj ishin të ligjshme dhe se mbulonin shpenzimet e kryera për periudhën 2003-2016.
Lidhur me gjendjen në kushtet e konfliktit të intresit, ajo shpjegoi se i kishte nënshkruar kontratat për arsye objektive dhe u justifikua se nuk kishte të tjera subjekte që operonin në qytetin e Përmetit veç asaj të kunatit dhe djalit të dajës së tij.
