Drafti i propozuar nga socialistët në Kuvend mbi ndryshimet në Kodin Zgjedhor duket se po kthehet në një dokument qesharak.
Pasi çuan drejt dështimit konsensusin me opozitën e bashkuar në Këshillin Politik, strategjia që po ndjek Rilindja për të garantuar votat në Kuvend është përfshirja në draft e propozimeve të asaj që konsiderohet si opozita parlamentare.
Kështu sot, PS ka propozuar një variant të ri të reformës duke i bërë një qokë deputetëve të kësaj opozite, që kanë paralajmëruar krijimin e partive të reja.
Në propozimin e hedhur nga Myslym Murrizi, i përfshirë në draftin e PS, është ai që kryetari i partisë mund të kandidojë në 4 qarqe, pra në rreth 20 bashki të vendit.
Referuar propozimit, nëse ai arrin të grumbullojë votat e nevojshme në 4 qarqet, merr mandatin e deputetit dhe zgjedh se cilën qark do të përfaqësojë.
Pra nëse është votuar në Gjirokastër, Korçë, Shkodër apo Dibër, deputeti me këtë model zgjedhje, në fund vendos të përfaqësojë një nga 4 qarqet edhe pse votat i ka marrë nga të gjitha qarqet ku ka emrin.
Ky propozim duket se nuk ka lidhje me standardet zgjedhore, por duket se socialistët po përfshijnë si propozime çdo ide që mund të hidhet nga deputetë me synim sigurimin e numrit 84 për miratimin e Kodit të ri Zgjedhor, i cili në variantin e Rilindjes, ndalon koalicionet parazgjedhore sikundër kanë funksionuar deri më tani.
