Franca ka filluar të marrë në shqyrtim skenarin për t’u mbyllur për herë të dytë, pasi numri i rasteve të reja me Covid-19 janë tepër të larta këto ditë. Mbi 10 mijë rastet e reja me COVID-19 në 24 orët e fundit kanë bërë që në Marsejë dhe Aix-en-Provence baret dhe restorantet të mbyllen për të paktën 15 ditë.
Në 11 qytete të tjera franceze përfshirë Parisin, Lionin, Tuluzën dhe Bordo-n nga sot baret do mbyllen pas orës 22:00 dhe pijet alkoolike janë të ndaluara.
Me këto ritme dhe nëse gjërat nuk ndryshojnë atëherë rrezikohet seriozisht që sistemi francez i shëndetësisë të futet në kolaps.
“Nëse asgjë nuk ndryshon, Franca do të përballet me një sistem shëndetësor të paaftë për t’iu përgjigjur të gjitha kërkesave“, – paralajmëroi Patrick Bouet, presidenti i Këshillit Kombëtar të Urdhrit të mjekëve, i cili u shpreh gjithashtu se “vala e dytë erdhi më shpejt sesa mendonim”.
Në këto kushte qeveria franceze ka menduar për një plan të ri, me qëllim që spitalet të menaxhojnë më mirë të prekurit me koronavirus. Si pasojë është vendosur që operacionet jo të domosdoshme të shtyhen, me qëllim që të lirohen objektet shëndetësore në tre zonë kryesore të Francës.
Për të shpëtuar Krishtlindjet, dy laureatët e Nobelit propozojnë bllokimin e vendit nga data 1 deri në 20 dhjetor
Dy laureatët e Nobelit në ekonomi, Esther Duflo dhe Abhijit Banerjee kanë propozuar se për të shpëtuar Krishtlindjet, duhet që Franca të marrë disa masa bllokuese për rreth tre javë.
Përmes një editoriali në Le Monde, ata theksojnë se Franca duhet të marrë disa masa kufizuese nga data 1 deri në 20 dhjetor, 2020 për të ulur rrezikun e infeksionit, si dhe duke ndihmuar familjet franceze pa rrezikuar të infektohen.
Të dy ekonomistët mendojnë se ky bllokim do të kishte një ndikim të kufizuar në shkolla dhe do të ishte shumë pak më i dëmshëm nga pikëpamja ekonomike, se sa “anulimi” i Krishtlindjes.
“Njerëzit mund të inkurajohen të bëjnë pazaret e tyre për Krishtlindje në nëntor”, shpjeguan ata.
Sipas Duflo dhe Banerjee, fitues të çmimit Nobel në vitin 2019 për punën dhe studimet e tyre në uljen e varfërisë, “një opsion kaq i qartë, uniform dhe transparent” do të zvogëlojë rreziqet nga infeksioni për grupet më të rrezikuara, veçanërisht të moshuarit.
Me bllokimin para pushimeve, Krishtlindja do të shpëtohej dhe familjet do të arrinin të bashkoheshin dhe në të njëjtën kohë përkeqësimi i ekonomisë dhe gjendjes në shkolla do të kufizohej.
Referuar të dhënave më të fundit të shëndetit publik në Francë, për herë të parë, arsimi në vend, mban numrin më të lartë të infektuarve, ndjekur më pas nga institucionet shëndetësore.
