Drejtoresha e Përgjithshme e Tatimeve, Delina Ibrahimaj, bën me dije se janë 1500 persona që nuk kanë mundur ende ta përfitojnë pagën e luftës.
Sipas saj janë njoftuar vazhdimisht nga ana e tatimeve që të plotësojnë numrin e llogarisë bankare, e vetmja problematikë që i ka bërë ata të mos jenë përfitues si 238 mijë të tjerët që e kanë marrë këtë pagë.
Teksa kujtoi se nga ana e tatimeve u shty me një muaj koha e lënë në dispozicion të këtyre individëve për të plotësuar dokumentacioni, Ibrahimaj paralajmëroi se afati i fundit për të aplikuar është data 25 shtator.
“Buxheti ka procedura, ndaj në një moment ky proces duhet përmbyllur”, tha drejtoresha e Tatimeve.
E pyetur lidhur me numrin e bizneseve të mbyllura gjatë periudhës së pandemisë, Ibrahimaj solli shifra të cilat sipas saj, vërtetojnë se numri i bizneseve të mbyllura apo që kanë kaluar në statusin pasiv në periudhën janar-qershor për 2020 është më i vogël se i atyre të mbyllura apo që kanë kaluar në statusin pasiv për të njëjtën periudhë të një viti më parë.
