Detaje të reja janv zbuluar lidhur me vrasjen e Klevis (Bledi) Kapllani, ngjarje e ndodhur ditën e sotme në fshatin Sinaballaj të Rrogozhinës.
Grupi hetimor ka marrë në pyetje nënën, babain dhe bashkëshorten e tij, ndërkohë që raportohet se është shoqëruar në komisariat shtetasi F.TH, kushëri me viktimën.
Policia nuk ka ende prova për implikimin e tij në këtë ngjarje, megjithëse ndaj tij po zhvillohet një seancë pyetjesh.
Kapllani kishte shlyer një dënim në Itali për trafik narkotikësh, ndërsa prej dy vitesh ndodhej në Shqipëri. Policia po heton si një nga pistat për zbardhjen e vrasjes edhe të shkuarën e viktimës, si dhe veprimtarinë e tij në territorin shqiptar.
Në vendin e ngjarjes është gjetur një armë zjarri tip pistoletë dhe një aparat celulari pa kartë brenda.
Zbardhja e tabulateve telefonike pritet të hedhë më tepër dritë mbi ngjarjen. Nga raportimet e ndryshme mësohet se viktima e përdorte programet e internetit për të komunikuar, ndërsa bisedat telefonike i kryente nga një tjetër numër.
Mësohet po ashtu se çështja është marrë nën hetim nga ekspertët e kriminalistikës së Tiranës.
